Ta tâm lơh tâm su, ăp rơh kơn nuĭh ƀon lan ta Tây Nguyên du nuih n’hâm tĭng Đảng, lĕ nsrôih râng rhŏ an nău tâm lơh tât nar dăng lĕ rngôch. Lah nuĭh kon bah rnoi nuĭh Xơ Đăng, deh ta ƀon Kon Gung, xă Đăk Sao, nkuăl Tu Mơ Rông, n’gor Kon Tum, lôch nău rêh wa A Tủi tĭng đah tahen. Têh jêng tâm ăp năm tâm lơh tâm su mprơh Mỹ tât sĭt rlu ranh rnôk ƀư Huyện đội trưởng nkuăl Đăk Tô, wa A Tủi nkah gĭt kơt ơm ăp năm tâm lơh tâm su hô ngăn. Năm aơ di nkah gĭt 48 năm rklaih đăp mpăn miền Nam kơp dơn ngoăy neh dak, Tahen ơm A Tủi âk năm hăn khâl tay ntŭk tâm lơh, ntŭk wa n’hanh băl lĕ janh dăng tâm lơh n’hanh lơh dăng, kơt B15, cứ điểm Đăk Tô-Tân Cảnh:

“Nar 30/4 mpôl hên bah cứ điểm B15 hăn ntop kơl ta n’gor Quảng Ngãi, rnôk dôl hăn ri mpôl hên tăng lĕ rklaih đăp mpăn lĕ rngôch miền Nam hôm. Rnôk nĕ mpôl hên rhoăt sĭt cứ điểm B15 ta Kon Tum, aƀaơ Ngih sam ƀŭt Quân sự địa phương. Rnôk tăng lĕ rklaih đăp mpăn lĕ rngôch miền Nam oh nô mpôl hên dŭt rhơn, tahen mpôl hên tap ty rhơn yor neh dak lĕ rklaih luh nău tâm lơh tâm su. Oh nô tahen mpôl hên nchrăp djăt nău đă gưl bah lơ ntĭm rđău nĕ lah nău kan têh bah nuĭh tahen”.

 Wa Y Tánh Mlô rnoi Bunong ta ƀon Phok, xã Ea Rbin, nkuăl Lăk, n’gor Dak Lak lĕ rlet rlău âk năm khay tâm lơh su ta nkual neh Tây Nguyên. Wa an lah, nău rêh rnôk nĕ jêr jŏt ngăn, yơn du nuih n’hâm tĭng Đảng tĭng cách mạng.

“Đảng, cách mạng bâh geh geh njêng rgŏ rgum jă ƀon lan tâm bri gay ma tĭng cách mạng. Bah năm 1958 tât năm 1975, nău rêh ta nĕ nơh tâm bri dơm jêr ngăn, ƀon lan ƀư mir ba tăm ba, tăm bum tât năm 1972-1973 rĭ Mỹ sui dak si dioxin. Tahen he n’hanh ƀon lan ji ngot ach o, hăn ta bri joi bum si, sreh djêl sa, tôch săm sa, joi ndơ sa tâm bri gay ma sa dơm, ma ƀon lan du nuih n’hâm ting Đảng tĭng cách mạng”.

 Xă Nâm Nung, nkuăl Krông Nô, n’gor Dak Nông lah nkual căn cứ rnôk janh dăng N’Trang Lơng rdâk lơh mprơh Pháp rŭn in, n’hanh dơi nthoi tay 2 rơh tâm lơh rklaih đăp mpăn rnoi nuĭh. Ntŭk aơ lah căn cứ B4-liên tỉnh 4, lĕ dơi dăp gưl di tích lịch sử cách mạng gưl ngih dak. Nâm Nung dôl dơi n’gor Dak Nông ndâk ƀư ntŭk rlu jâng ta trong pâl nđaih “Trương ca bah dak n’hanh ŭnh” ta Công viên địa chất lam ntŭr neh UNESCO Dak Nông. Căn cứ Nâm Nung lah “ntŭk khlay” ntĭm nti nău way ơm cách mạng đah năch pâl nđaih ta trong sĭt tu tơm. Nghệ nhân Y Xuyên, ta ƀo Jarah, xă Nâm Nung, nkah gĭt tay ăp nar khay ndrel ƀon lan kơl tahen lơh Mỹ:

 “Kăl e tâm lơh tâm su hô ngăn, mìn bom ăp ntil, mpôl hên gŭ tâm bri rnôk ndeh păr ntŭp bom mpôl hên du tâm ntu. Rnôk ndeh păr hăn ri mpôl hên pơ̆ tay rhŏ an tahen anh ndrăk nsiu n’hanh nsơ sông sa. Rnôk tahen mô tŏng bôh, ƀot ngot... ri mpôl hên hăn hăn tâm bri an tahen”.