VOV4.M'nông: Dơn hôm 3 pơh tay đŏng lah ƀư rơh thi tốt nghiệp THPT. Aƀaơ, n'gâng kan ntĭm nti ăp n'gor tâm nkual Tây Nguyên dôl n'hao âk ôn luyện nău gĭt blău an kon se nti, nchrăp drăp ndơ gay rơh thi geh nău dơi dŭt uĕh. Ndrel đah, du đêt n'gor mbra geh trong ntop kơl prăk măt kơl ăp nuĭh râng thi geh nău rêh jêr jŏt, kon se nuĭh rnoi mpôl đêt đăp mpăn râng thi.

Ta Kon Tum, rơh thi tốt nghiệp THPT năm aơ geh rlău 4.700 nuĭh đăng ký râng thi. Aƀaơ, ăp nhih nti tâm n'gor dôl n'hao âk pah kan nkah tay nău gĭt blău hŏ nti an kon se. Gay uănh năl di nău dơi bah tĭng kon se nti, Sở Giáo dục n'hanh Đào tạo n'gor Kon Tum rđău đă ăp nhih nti leo ƀư an lĕ rngôch ăp kon se nti jrô 12 thi rlong. Ntơm bah lôch jêh ƀư bài bah kon se nti geh nău uănh năl tay lam lĕ rngôch gay năn ngăch kơi ntop, rgâl tâm di nkô̆ ôn thi tĭng môn kơl kon se nti dơh rƀah gĭt nău nti n'hanh rƀah gĭt nău nti. Nai ntĭm Nguyễn Tiến Định, Hiệu trưởng Nhih nti THPT Trần Quốc Tuấn, thị trấn Đăk Hà, nkuâl Đăk Hà, an gĭt:

        “Nhih nti dôl ryôt ryăt, ăp rmôt chuyên môn grêt dăch nô nău ôn thi. Lơn lah n'hao dăng pah kan kơp uănh hồ sơ giáo án. Rmôt chuyên môn ân rđău đă dăch dêh đah nai ntĭm nti. Nkre way sŏk nău plơng ơh rlơ̆ bah ăp kon se nti gay rlong uănh gĭt hŏ dơi  đŏng lah mô. Tât nar 30/6 nhih nti hŏ ƀư lôch jêh an ăp kon  se geh du nuĭh n'hâm nsan nchrăp lăp tâm ri thi ân geh nău dơi dŭt uĕh”.

        Sở Giáo dục n'hanh Đào tạo n'gor Kon Tum nchrăp njêng 12 ntŭk thi, đah 203 jrô thi, 41 jrô kâp n'hanh rnă ntêm lor. N'gor hŏ geh trong nchrăp ăp tŏng an ăp kon se nti nkual jru, nkual ngai rnôk hăn thi geh ntŭk gŭ, ntŭk sa đŏng.

Ta Dak Lak, rơh thi dja geh 20.455 nuĭh đăng ký râng thi. N'gor dơi tâm pă 32 ntŭk  thi đah 951 jrô thi ta 15 nkuâl, nkual ƀon têh, thị xã. Aƀaơ, n'gâng kan ntĭm nti n'gor dôl ƀư ôn nkah tay an kon se nti. Ta Nhih nti THPT Thực hành Cao Nguyên (ta nkual ƀon têh Buôn Ma Thuột), bơi 300 kon se nti jrô 12 dôl hăn tât nhih nti mbro ăp nar gay ôn thi. Oh Lê Thị Minh Nguyệt, kon se nti ta aơ an gĭt:

    “Rlău ma mông kơi hăn nti ta nhih nti, gâp hôm râng du đêt jrô nti bah dih nhih nti đŏng, sĭt jay gâp nơm nti êng, pơk joi êng ta trang web nsing nơm”.

        Ta Nhih nti THCS n'hanh THPT Đông Du, nkual ƀon têh Buôn Ma Thuột, pah kan ôn thi tốt nghiệp THPT dơi n'hao âk pe tơ̆ đŏng: Ôi, kêng măng, măng ngo. Ndrel đah nău tâm pă ntil kon se nti tĭng ăp rmôt tổ hợp Khoa học tự nhiên, Khoa học xã hội, nhih nti hôm tâm pă ntil kon se nti tĭng nău dơi gĭt êng gay geh trong ôn tập tâm di. Nai ntĭm Chu Thị Dạ Thảo, nai ntĭm môn Ngữ Văn, lah:

       “Tâm rnôk ntĭm nti he an kon se nti châm bài an săk he nơm n'hanh chấm bài tâm chong cheng đah ăp băl kon se nti nơm yor tĭng nău mĭn lah rnôk kon se nti gĭt trong chấm bài thi ri mbra gĭt đah nău ŭch đă n'gluh bah đề thi”.

Sở Giáo dục – Đào tạo Dak Lak đă ăp nhih nti THPT lor rdâk njêng trong nchrăp, sơch ăp trong ôn tập tâm di đah nkô̆ tĭng môn nti n'hanh nău gĭt blău bah kon se nti. Đah kon se nti geh học lực trung bình, yếu, nai ntĭm n'hao âk ôn tập rgum tơm. Đah rmôt kon se nti khá, giỏi, nhih nti ôn tập n'hao prêh kơl ăp kon se nti way bên đah ntil đề geh rnoh tâm pă gưl âk. Wa Phạm Đăng Khoa, Giám đốc Sở Giáo dục – Đào tạo Dak Lak lah:

      "Mpôl hên hŏ ntĭm leo ăp nhih nti THPT rdâk njêng ăp bộ đề tham khảo ăp bộ đề bah Sở Giáo dục – Đào tạo gay rlong thi n'hanh uănh năl gĭt blău bah nhih nti. Nkre lôch jêh nê geh trong nchrăp ƀư ôn tập an ăp kon se. Đăp mpăn ăp kon se nkah jru nău gĭt râng rơh thi tốt nghiệp bơi tât”.

Ta n'gor Dak Nông, rơh thi dja geh rlău 6.870 kon se nti đăng ký râng thi, tâm nê geh nklăp 1.580 kon se nti nuĭh rnoi mpôl đê̆. Ndrel đah nău đăp mpăn tŏng ăp drăp ndơ, n'hanh năp nău gĭt blău an kon se nti, n'gor tĭng ƀư tay trong ntop kơl prăk măt kơl kon se nti geh nău rêh wăng sa jêr jŏt, kon se nti nuĭh rnoi mpôl đê̆ đăp mpăn râng thi. Wa Phan Thanh Hải, Groi Giám đốc Sở Giáo dục đào tạo n'gor Dak Nông, an gĭt, năm aơ,  n'gor tĭng ƀư tay trong ntop kơl prăk măt rlău 300.000 prăk an ăp kon se nti geh nău rêh jêr jŏt, kon se nti nuĭh rnoi mpôl đê̆, kơl ăp kon se nti đăp mpăn râng thi:

          “Bah meng nău ôn tập an kon se nti ri mpôl hên nsŏng kơl tay an UBND n'gor mpeh ăp trong nkra thi nsing tâm nău dơi geh ngăn ngăn bah n'gor, đăp mpăn ăp nkô̆ nău rnă njrăng, đăp mpăn hăn ntung trong dơh soih an kon se nti rsong hăn...Lơn lah đah kon se nti lah oh kon nuĭh rnoi mpôl đê̆, kon se nti geh nău rêh wăng sa jêr jŏt, ri Sở giáo dục geh nău dơn nchih rgum, tâm rlak tâm pă prăk dŏng tâm di gay nsŏng kơl hao mbơh rblang UBND n'gor geh rnoh ntop kơl tâm di, mhâm ƀư gay mô an geh nău kon se nti ntlơi nti tă bah jêr jŏt mpeh wăng sa lah mô geh ndơ ma rsong hăn”.

          Đah nău nchrăp ăp tŏng mpeh drăp ndơ, leo ƀư ôn tập nău nti ăp tŏng na nê̆, nău rgop kan nsum uĕh đah ăp mpôl kan dơi kan, Rơh thi tốt nghiệp THPT năm aơ ta ăp n'gor Tây Nguyên mbra geh nău dơi uĕh./.

Nuĭh rblang: Điểu Thân