Rơh tâm rlong tốt nghiệp THPT năm aơ n’gor Kon Tum geh rlău 5.000 kon hŏk, hao 273 kon hŏk nkôp đah năm e. Tâm nĕ, rlău 4.800 kon hŏk râng tâm rlong bôk nău ntĭm nti THPT n’hanh rlău 160 kon hŏk râng tâm rlong bôk nău ntĭm nti thường xuyên. Rnoh kon hŏk rnoi mpôl đêt râng tâm rlong geh rlău 1.700 oh, kon hŏk dah rŏng bơi 220 oh. N’gor Kon Tum lĕ ndâk njêng 12 ntŭk tâm rlong, tâm nĕ 5 ntŭk tâm rlong ta nkual ƀon têh Kon Tum, 7 ntŭk tâm rlong ta ăp nkuăl n’hanh nuĭh kan pă uănh tâm rlong ta ăp ntŭk tâm rlong rlău 900 nuĭh. Nai Bùi Văn Quốc, Groi Hiệu trưởng Ngih sam ƀŭt PTDTNT-THCS nkuăl Kon Plông, an gĭt, năm aơ, ngih sam ƀŭt geh 82 kon hŏk râng tâm rlong tốt nghiệp THPT đah lĕ rngôch lah oh kon rnoi mpôl đêt Xơ đăng.

“Tât rnôk aơ ngih sam ngih sam ƀŭt lĕ jêh bôk nău ntĭm nti tay lvang 1, ngih sam ƀŭt lĕ ƀư rlong tâm rlong an kon hŏk. Tâm nar 5tât ngih sam ƀŭt uănh tay ăp kon hŏk nti mô gĭt gay ntĭm nti ntop tay gay nsrôih an geh nău rƀŏng 100% kon hŏk tâm rlong dơi tốt nghiệp. Mpeh trong kan mât rong kon hŏk, ngih sam ƀŭt ntĭm rđău gưl hành chính ngih sam ƀŭt n’hao ndơ sông sa an ăp oh tâm khay 6 đăp mpăn săk soan an ăp oh tâm rlong”.

Rơh tâm rlong tốt nghiệp THPT năm 2023, n’gor Gia Lai geh rlău 14.800 kon hŏk dăn râng tâm rlong, tâm nĕ geh rlău 3.100 kon hŏk rnoi mpôl đêt. N’gor rgŏ jă nklăp 2300 cán bộ ƀư trong kan uănh tâm rlong ta 41 ntŭk tâm rlong ta 17 nkuăl, nkual têh, nkual ƀon têh. Ban ntĭm rđău gưl n’gor lĕ đă UBND ăp nkuăl, nkual têh, nkual ƀon têh n’hanh ăp nău kan geh tât ntop kơl kon hŏk đah ndeh hăn nsong, an ntŭk gŭ sông sa an kon hŏk. Bah meng nĕ, kơp uănh tay, ntop kơl prăk an ăp kon hŏk lah nuĭh rnoi mpôl đêt, rnăk wâl dơi kơl, rnăk ach o, kon hŏk nkual jru ngai. Lơn lah mô an kon hŏk ntlơi tâm rlong yor mâp jêr jŏt đah ndoh ndơ prăk kaih hăn nsong.

Ntoh ngơi ta nar pah kan đah Ban ntĭm rđău rơh tâm rlong tốt nghiệp THPT 2 n’gor Kon Tum n’hanh Gia Lai, Groi Kruanh N’gâng kan ntĭm nti Ngô Thị Minh djôt dơn uănh lah prêh trong nchrăp ƀư rơh tâm rlong du trong nchrăp lor bah ăp ntŭk. Nkre đă ăp ntŭk kan geh tât an ƀư tĭng rjăp ăp nău ntrŭnh bah N’gâng kan ntĭm nti mpeh trong kan tâm rlong; uănh nđôi tay ăp ntil nchrăp an saơ n’hanh mkra ngăch ăp nău mâp dơi geh. N’hao nkoch trêng, ntĭm an kon hŏk n’hanh me bơ̆ mpeh trong ƀư, nău ntĭm tâm rlong; tâm rgop rjăp đah ăp ngih pah kan dơi kan gay đăp mpăn, tâm ban, di an rơh tâm rlong. Groi Kruanh N’gâng kan Ngô Thị Minh, lah:

“Ban ntĭm rđău bah n’gor mpeh rơh tâm rlong tốt nghiệp THPT 2023 lĕ tĭnh trong ƀư n’hanh nchrăp tâm nău kan bah nơm. Trong kan tiărr nti an ăp nuĭh pah kan tâm rlong lah nău dŭt khlay, mbra dơi saơ ăp ndơ mpeh bôk năp mô hŏ tâm di ri n’gor dăn đă, tâm rgâl gay jêh ăp rơh tâm rlong, rơh tâm rlong năm bah kơi mbra săk rnglăy n’hanh uĕh lơn rơh tâm rlong năm bah năp. Trong ƀư tâm rlong đah ăp kon hŏk râng tâm rlong he mô thơ tha, nău mbơh rblang trong ƀư an ăp oh an rgâl mhe mbơh rblang trong ƀư tâm rlong, gay ăp oh ngăn ngêt lah nuĭh tâm trôm. Nău ăp oh kon hŏk râng tâm rlong đah nău kan mpeh mông nar, trong ƀư ri an nsrôih nkoch tay tât ăp oh”.

Groi Kruanh n’gâng kan ntĭm nti Ngô Thị Minh đă ăp ntŭk mô an nău mĭn thơ tha; tâm trong kan tiăr nti trong ƀư tâm rlong an rgâl mhe gay dơi nuĭh tiărr nti tŏng ăp trong ƀư di gưl nău kan bah nơm; năp tŏng ăp nău kan gay nuĭh pah kan ta rơh tâm rlong rdâng đah ăp nău ntoh mhe; trong nchrăp uănh nđôi bah Ban ntĭm rđău rơh tâm rlong an ndâk njêng na nê̆. Groi Kruanh N’gâng kan ntĭm nti Ngô Thị Minh, lah rjăp:

“Rơh tâm rlong an đăp mpăn rnoh an mpeh đăp mpăn. Đăp mpăn mpeh nău săk soan, nău rêh an ăp oh. He nsrôih gay ăp oh lăp jrô tâm rlong uĕh, rah rơih nău mĭn đăp mpăn. Đăp mpăn nău ndơ sông sa. Đăp mpăn trôk nar lah geh mih, trong mbĭr hăn nsong bah ăp oh jêr jŏt. Đăp mpăn njrăng n’gang rtoh ŭnh sa âk rnôk bri mih way ƀoh điện. Đăp mpăn mât uănh đề tâm rlong, bài tâm rlong. Đăp mpăn njrăng n’gang srê rơh tâm rlong đăp mpăn tŏng ăp”.

Rơh tâm rlong tốt nghiệp THPT năm 2023 ƀư ta dŭt khay 6. Tâm nĕ, nar 27/6 lah nar ƀư sam ƀŭt râng tâm rlong. Ƀư uănh tâm rlong tốt nghiệp THPT tâm 2 nar 28 n’hanh 29/6. Ăp ntŭk an uănh tât nău nkoch trêng an kon hŏk, me bơ̆ n’hanh kon nuĭh wât mpeh nău khlay bah rơh tâm rlong tốt nghiệp THPT; ngăch rnê rhơn, nkhôm đah ăp rmôt kan, êng nuĭh geh uĕh nău kan ƀư rơh tâm rlong kơt rmal rjăp ăp nuĭh tih ƀư khuch tât rơh tâm rlong.