VOV4.M'nông: Ndrel đah lam dak, nar 5/9, ăp n'gor Tây Nguyên khuh n'gôr nar khai giảng năm nti mhe, ăp n'gor nsrôih ƀư bah ăp nău jêr jŏt, đăp mpăn tŏng ăp drăp ndơ n'hanh săk blău ntĭm nti ntơm bah  bôk năm nti.

Ta Dak Nông, rlău 184.000 kon se nti ăp gưl hŏ rgum lăp nar plơ̆ tay nhih  nti ntơm bôk năm nti mhe 2022-2023. Năm nti dja, lam n'gor Dak Nông geh 368 ntŭk ntĭm nti, đah 184.135 kon se nti, hao 8.508 kon se nti rđĭl đah năm nti bah năp nơh. Nchrăp an năm nti mhe, bah ăp tơm prăk, n'gor Dak Nông hŏ ntuh kơl bơi 330 rmen prăk rdâk njêng, nkra têh hvi nhih nti n'hanh rvăt năp ndơ dŏng ntĭm nti. N'gâng kan ntĭm nti ƀư ăp rnoh ndranh rvăt ndrôm si ƀŭt, si ƀŭt nchih phăt an kon se nti nuĭh rnoi mpôl đê̆; kơi ntop ndơ dŏng ntĭm nti rhŏ dŏng an bôk nău  kan ntĭm nti mhe, ndơ dŏng nti bah ngai đah rnoh prăk rlău 67 rmen prăk. Năm nti dja, bol hŏ dơi ntop 115 biên chế nai ntĭm yơn lam n'gor Dak Nông hôm mô tŏng 966 nai ntĭm ta lĕ rngôch ăp gưl nti đŏng. Ăp nkuâl hŏ an ƀư trong nchrăp đă rgâl nai ntĭm n'hanh kơi năp nti an nai ntĭm tiểu học (ntĭm môn nsum) mbra dơi ntĭm lĕ ma môn giáo dục thể chất, công nghệ. Ăp nhih nti nta trong dơh an ăp nai ntĭm, nai ntĭm hăn nti văn bằng 2 sư phạm mpeh way ntĭm tiếng Anh, Tin học gay tâm pă nti ta gưl tiểu học…

Ta n’gor Dak Lak, ăp ngih nti tâm ndrĭh ƀư ntơm lăp năm nti mhe 2022-2023. Năm nti aơ, lam n’gor geh rlău 450 rbăn kon hoc ăp gâl, tâm nĕ kon hoc rnoi đê̆ geh rlău 56%. Tĭng nău mbơh bâh wa Phạm Đăng Khoa, Giám đốc ntŭk kan ntĭm n’hanh nti ta Dak Lak, năm nti aơ lam n’gor geh rlău 1 rbăn ngih nti, đah rlău 450 rbăn kon hoc ta ăp gâl nti. Rơh ntơm lăp năm nti mhe 2022-2023, ăp ngih nti bâh nkuăl têh tât ntŭk njônh ngai, nkual ƀon lan rnoi đê̆ lĕ geh ƀư ueh, tâm di, khlăy n’hanh njêng nău gơih nđơr an nai nti n’hanh kon hoc ta n’gor Dak Lak tâm năm nti mhe. Ta rơh lăp năm nti mhe 2022-2023 bâh ngih nti THPT Nội trú Nơ Trang Lơng, nkuăl ƀon têh Buôn Ma Thuột, n’gor Dak Lak, wa Bùi Xuân Lễ, hiệu trưởng ngih nti an gĭt: Đah nău kan tơm khlăy lah n’hao nău ueh di ntĭm nti ăp ntŭk n’hanh tơm khlăy, nai nti n’hanh kon hoc ngih nti THPT dân tộc nội trú Nơ Trang Lơng geh ntrôl dăng tay ntrong kan ntĭm n’hanh nti.

 17.500 kon se nti ta nkuâl n'har bri Ea Súp bah n'gor Dak Lak hŏ lăp tâm năm nti mhe 2022 – 2023 tâm khuh n'gôr rhơn nđơr, trôk nar nđik uĕh nar khai giảng. N'hâm sial tâm ban kơt năm nti bah năp nuh srê Covid - 19 krit nji, kon se nti ân râng lễ khai giảng online, năm aơ, nai ntĭm n'hanh kon se nti râng Lễ Khai giảng na nê̆ tât ăp nhih nti đah nuih n'hâm rhơn nđơr. Gay nchrăp an năm nti mhe, nkuâl n'har bri Ea Súp hŏ ntuh kơl rlău 5,2 rmen prăk rdâk njêng drăp ndơ, rvăt năp ndơ dŏng nti. Rlău 1.200 tơ̆ nai ntĭm hŏ râng ăp jrô kơi năp nti n'hao nău blău kan ntĭm nti gay đăp mpăn pah kan ntĭm nti.  

Năm nti mhe 2022-2023, n’gor Lâm Đồng geh rlău 330 rbăn kon hoc ăp gâl. Gay ma mât đăp mpăn bôk nău kan ntĭm n’hanh nti geh săk rnglăy, n’gâng kan ntĭm nti Lâm Đồng lĕ ƀư lôch nău ntĭm nti an mpôl nai nti tĭng bôk nău kan ntĭm nti phổ thông mhe ta ăp jrô nti 3,7 n’hanh 10. Bâh rnoh prăk ntuh kơl nsum 600 rmen prăk lĕ geh n’gor an ƀư lor pă an, n’gâng kan ntĭm n’hanh nti Lâm Đồng lĕ ngăch ndăn ntơm ƀư 2 nău kan mhe, ƀư tĭng geh 26 nău kan ndơ̆ mbơh n’hanh 24 nău nchrăp kan ƀư lôch. Ngăn lah, ngăch nkra mhe 19 ngih nti đah rnoh prăk 35 rmen prăk, dŏng rlău 120 rmen prăk rvăt năp ndơ dŏng ntĭm nti, bư lôch ăp nău kan khlăy kơl an nău ŭch ntĭm n’hanh nti ta năm nti mhe, nđâp ma ăp ngih nti ta nkual njônh ngai, nkual rnoi đê̆. Ta meng mât đăp mpăn nău ntĭm n’hanh nti, n’gâng kan ntĭm nti n’gor Lâm Đồng dôl nsrôih tâm rgop đah n’gâng kan dak si ntrôl dăng ngăch nău chuh vacxin Covid-19 an kon hoc tĭng di nău ntrŭnh.

   Năm nti 2022 – 2023, n'gor Gia Lai geh 762 ntŭk ntĭm nti đah rlău 400 rbăn kon se nti ta ăp gưl nti. Lễ Khai giảng năm nti  mhe dơi  ăp nhih nti  ƀư dơh glêh, huêng khlay ndrel ăp nău kan văn hóa njroh mprơ hŏ njêng khuh n'gôr rhơn mƀak, gơih nđơr bah nar rgum nhih nti lôch du năm jêr jŏt tă khuch bah nuh srê Covid-19.

Nuĭh rblang: Điểu Thân n'hanh Thị Đoắt