Tây Nguyên, đah nău way ơm dăng janh, tâm rnglăp krêp mpêt, ƀon lan ăp  rnoi mpôl đê̆ du nuih n’hâm đah Đảng, đah Wa Hồ dêh rŏng. Tâm bar rơh tâm lơh tâm su lơh Prăng mprơh Mỹ, xã n’har bri Quảng Trực (nkuâl Tuy Đức, n’gor Dak Nông) lah ntŭk rdâk, hun hao trong leo kan cách mạng ta nkual mpeh bah dâng Tây Nguyên. Đah nău way ơm lịch sử n’gloh ang, dăng janh, rôih sŏng rlăch ndăng cách mạng, năm 2019, xã Quảng Trực hŏ dơi Thủ tướng Chính phủ kơp  dơn lah xã An toàn khu n’hanh wơt dơn Bằng dăp gưl ntŭk têl ơm yău gưl n’gor. Wa Thị Brao, nuĭh geh nsing nơm  Ƀon Bu Prâng 1A, xã Quảng Trực an gĭt, kônh wa nuĭh Bu Nong ta aơ dŭt n’hao êng săk nău  way ơm cách mạng n’gloh ang. Kônh wa  way nsrôih mât ndray, ntik n’hao nău way  ơm  nê, lĕ ma tâm pah kan jan sa.

“Kônh wa mpôl hên n’hao êng săk mpeh nău way ơm cách mạng n’gloh ang bah nkual neh dăng janh Quảng Trực dja. Ăp năm rlău aơ mpôl hên way rgŏ jă kônh wa tâm rnglăp, dơn ngoăy, way nsing nơm, tĭng Đảng, Ngih dak gay rdâk njêng ƀon tơm, neh dak têh uĕh geh ndrŏng. Mpôl hên way ntĭm nti kon său ân way mât ndray nău way ơm cách mạng n’gloh ang. Nkhêp geh năm mhe, gâp dăn an kônh wa ta ƀon lan n’hanh nuĭh ƀon lan lam dak du năm mhe geh nău dơi, way tâm rnglăp,  dơn ngoăy gay rdâk  njêng ƀon tơm, neh dak nar lơn ma hun hao.”

Kônh wa ăp rnoi tâm nkuăl Ia Pa, n’gor Gia Lai rhơn lah nkuăl neh ơm yau cách mạng. Lam nkuăl geh rlau 11.100 rnăk, đah nklăp 57 rbăn nŭih, tâm nê rlau 70% lah rnoi mpôl đê̆, ngăn lah rnoi Bahnar ndrel Jâi. Âk bu ndăm râng ndrel têh jêng tâm nau kan cách mạng, jêh aơ nơh hŏ jêng rmôt rđau kan tơm bah nkuăl. Lah rơh mom têh jêng bah nkuăl neh geh âk nau ơm yau, nô Rô Hôk, tâm xãIa Mrơn, nkual Ia Pa, ngơi:

‘Xã Ia Mrơn, nkuăl Ia Pa, n’gor Kon Tum lah nkuăl neh geh âk nau ơm yau cách mạng. Aơ lah ntŭk kan cách mạng ndrel geh nau tâm lơh rklaih rnoi mpôl. Jêh rnôk neh dak đăp mpăn, geh nau kơl an bah Đảng, Ngih dak, kônh wa ta aơ mro tâm rnglăp, nsôih pah kan hun hao văng sa, jut n’huch ach o. Rnơm nê, âk rnăk nar lơn hun hao, nau rêh nar lơn geh jêng, rgâl ăp nar. Ndơn choat tay, druh ndăm nkuăl, gâp mro ƀư kơt tĭng nau ueh ơm cách mạng. Nkre nkoch trêng, bonh đă ƀon lan ƀư tĭng nau ntrŭnh bah Đảng, pháp luật bah Ngih dak, nsôih hun hao văng sa, jut jăng ach o rlu mâl, mât ntŭk ntu gŭ âm, nkah đă oh kon se nti ân tât dŭt tât lôch, rgop nau ndâk njêng ƀon tơm cách mạng sâm geh’.

 Nkuâl Dak R’Lấp, n’gor Dak Nông lah ntŭk gŭ rêh bah ơm bah nuĭh Bu Nong. Tâm ăp rơh tâm lơh tâm su, kônh wa ta aơ du nuih n’hâm tĭng Đảng, tĭng cách mạng. Wa Điểu Xem, lah bu ranh ƀon, tahen ơm, nuĭh geh nău nsing nơm ƀon Đắk Blao, thị trấn Kiến Đức, nkuâl Dak R’Lấp an gĭt, rơh mom ndăm bah păng hŏ geh âk nuĭh dăng  janh râng tâm lơh  tâm su gay nsĭt tay nău đăp mpăn, mât njrăng neh dak. Wa  Điểu Xem dŭt n’hao êng săk mpeh nău way ơm cách mạng bah tahen n’hanh ƀon lan  he aƀaơ, păng ndrel đah ăp rơh kơn hăn lor bôk  năp way nsrôih ntĭm nti kon său ân mât ndray, ntik  n’hao nău way ơm cách mạng nê:

“Mpôl hên dŭt n’hao êng săk mpeh nău way ơm cách mạng bah ƀon tơm, neh dak. Đah nău way ơm cách mạng kơt nê̆, kônh wa way tĭng jăp ăp gung trong, trong nchrăp bah Đảng, pháp luật bah Ngih dak. Gâp dŭt rhơn lah nău way ơm cách mạng hŏ way dơi mât mbro, ntik n’hao, rơh mom  ndăm ta ƀon lan gĭt kloh nău dja đŏng. Nđơn tay nău way ơm cách mạng bah u che he tâm ƀon nsrôih kơt nti, n’glăp tâm đảng, druh ndăm tât năm hăn lăp tahen ăp tŏng. Kônh wa aƀaơ geh nău rêh ăp tŏng, rhơn  răm”

Wa Liêng Hó Ha Kliêng, rnoi K’ho tâm thôn Srê Đăng, xã Nthol Hạ, nkuăl Đức Trọng, n’gor Lâm Đồng. Jêh rnôk rkaih đăp mpăn miền Nam, wa râng mât nau kan đăp mpăn tâm dâng, ƀư nau kan tâm ntŭk tâm boh tuch tăm. Rnôk aơ wa dôl lah Kruanh rmôt nŭih bu ranh, nŭih kan tâm rmôt kơl rjaih nau tâm thon srê Đăng. Wa Liêng Hót Ha Kliêng mro mât kon sau nơm mpeh ăp nau tă dơi bah cách mạng ndrel mro rhơn rnôk ndơn saơ nau tâm rnglăp bah ăp rnoi tâm nkuăl kŏ kơt lah lam dak geh ƀư ueh:

‘Nŭih rnoi mpôl đê̆ mro ntĭm nti ân kon sau nơm mpeh ăp nau dơi geh bah cách mạng ndrel mrô nsôih, rhơn rnôk saơ nau tâm rnglăp bah ƀon lan ăp nroi tâm nkuăl kŏ kơt lah lam dak geh ƀư ueh”.