VOV4.M’nông: Nău mbơh ƀư Rơh rgŏ jă “Việt Nam kơl lor dŏng ndơ Việt Nam” năm bah năp lĕ nsĭt tay săk rnglăy ngăn ngên, kơt ndâk njêng trong tâm rgop nkra njêng, tăch ndơ Việt Nam nâp nâl; n’hao rnoh ndơ Việt Nam geh âk trong tăch tâm pă... Tă bah nĕ rgop kơl nuĭh dŏng dơi gĭt đah âk lơn ndơ uĕh.

Ƀư tĭng mbơh ƀư rơh rgŏ jă “Nuĭh Việt Nam kơl lor dŏng ndơ Việt Nam”, năm bah năp âk doanh nghiệp tâm dak lĕ mbơh ƀư âk trong mkra ntrŭt pơk hvi nkra njêng, dŏng tâm dak; n’hao âk ndơ tâm dak, mpla nsơ, nkoch ndơ, ndơ ntoh lư; pơk hvi ntŭk tăch, lơn lah ăp nkual ƀon lan, nkual jru ngai. Bah nĕ ƀư uĕh tơm khlay bah nơm tâm nău đăp mpăn pă an ndơ, tăch rgâl kơt: ndơ sông sa, ndơ dŏng...

Tĭng uănh lah bah âk nuĭh dŏng, aƀaơ ndơ Việt Nam dôl nar lơ dơi săch âk yor khlay tâm di, tâm di đah dŭng prăk bah ăp rơh kơn kon nuĭh. Ndrel đah nĕ uĕh nâp nar lơ dơi hao, uĕh mhe đah ăp ntil... ăp ndơ dơi âk nuĭh săch ngăn lah: Ndơ lŏ mir, kho ao, ndơ dŏng. Wa Chu Quang Hào, Tổng giám đốc Tổng Công ty Bưu điện Việt Nam an gĭt, bah năm 2019 Tổng công lĕ ntuh kơl n’hanh mbơh ƀư tăch rgâl điện tử Postmart.vn gay ntrôl dăng tăch đah ăp ndơ tâm dak nkra njêng. Êng năm e, dĭng lĕ rnoh ndơ tăch geh 120 rmen, lĕ tăch geh rlău 500 rbăn ndơ ndơ lŏ mir an kônh wa ƀon lan ta âk n’gor ta lam dak kơt: Bắc Giang, Lào Cai, Bến Tre... ndrel dŭt âk ntŭk, nsĭt tay âk săk rnglăy uĕh tâm nău tăch ndơ an kônh wa ƀon lan n’hanh âk doanh nghiệp ta lam dak.

Nĕ lah ăp nău uĕh bôk năp, khlay bah ntŭk tăch rgâl điện tử bah Postmart bah Bưu điện Việt Nam lĕ dơi ƀư tâm 2 năm bah năp rnôk chôt srê ntoh. Aƀaơ đah nău kan dơi chính phủ, ăp N’gâng kan Thông tin n’hanh Truyền thông jao nĕ lah ndâk njuêng n’hanh mbơh ƀư ntŭk tăch điện thư bah Postmart jêng ntŭk tăch Việt, gay ndơ̆ lĕ rngôch ndơ lŏ mir kah uĕh tĭng nkual kơt ăp ndơ bah Made in Việt Nam hao ntŭk tăch điện tử.

Tĭng Groi kruanh N’gâng kan Công thương Đỗ Thắng Hải, aƀaơ rnoh ndơ Việt Nam ta ntŭk siêu thị, ntŭk tăch lĕ hao tât 80-90%; êng rnoh ndơ Việt ta ntŭk siêu thị Go bah Tập đoàn Central Retail lĕ nsĭt tay săk rnglăy dŭt n’hâm têh. Groi kruanh n’gâng kan Đỗ Thắng Hải an gĭt, gay mbơh ƀư tay nău rgŏ jă tâm năm tât, N’gâng kan Công thương lĕ ndâk njêng n’hanh dơi Thủ tướng Chính phủ uănh an bôk nău rgop an tâm nchră hun hao ntŭk tăch tâm dak hăn ndrel đah nău rgŏ jă nuĭh Việt Nam kơl dŏng ndơ Việt Nam lvang 2021-2025. Bôk nău rgop an tâm nchră geh nkô̆ dŭt khlay tâm nău đăp mpăn nău rêh bah nuĭh ƀon lan, mât hun hao wăng sa-rêh jêng đăp mpăn bah năp rnôk geh âk nău rgâl duh jêr wăng sa ta lam ntŭr neh; ntŭl rlong bah rgum lăp n’hanh khuch bah srê Covid-19.

Tâm bôk nău rgop an tâm nchră rƀŏng tât nău ŭch an rgop hun hao ntŭk tăch tâm dak, ƀư săk rnglăy trong tâm pă tăch ndơ. Bah nĕ ndâk njêng ăp trong nău khlay pă an ndơ tŏngh ăp, jêng nău tâm rgop rjăp đah ăp nuĭh tơm ta ntŭk tăch bah nuĭh nkra njêng tât nuĭh dŏng bah Trung ương tât ƀon lan bah doanh nghiệp n’hanh tât ăp ngih pah kan ngih dak gay ndơ̆ ndơ uĕh kah bah âk nkual êng êng tât ty nuĭh dŏng ta ƀon lan n’hanh wăch rgum ndoh ndơ lŏ mir kah ta ntŭk tât ăp n’gor, nkual ƀon têh.

Gay ntrôl dăng Nău rgŏ jă “Nuĭh Việt Nam kơl dŏng ndơ Việt Nam” kơt ndơ Việt Nam nar lơ geh âk nău nsing nơm bah nuĭh dŏng tâm dak âk tay, ăp doanh nghiệp an ntrôl dăng nău ndâk njêng moh êng ndơ, rgâl mhe, ntuh kơl ndoh ndơ khoa học công nghệ mhe gay n’hŭch rnoh khlay ndơ, n’hao dơi tâm rlong. Ntrôl nău pơk hvi nău tâm rgop, boăt nthoi ndâk njêng râng tâm ăp trong ƀư... gay ndơ, tăch nar lơ uĕh nâp./.

Nuĭh rblang: Y Sưng Phê Ja