Du bông nău rêh nău kan cách mạng, Kruanh Hồ Chí Minh way nkoch tât nkô̆ nău dâk leo lor bah năp mpôl bah nuĭh cán bộ, đảng viên, lor bôk năp lah dâk leo lor nău mĭn, nuih n’hâm uĕh lŏng, trong gŭ rêh. Lăp tâng jru nău mĭn nê, tâm bah ri aơ nơh, cán bộ, đảng viên n’hanh ƀon lan ăp rnoi nuĭh Tây Nguyên way mô rlu kơt nti n’hanh ƀư tĭng nău Wa ta ăp ntil  nău kan, lơn lah tâm trong dâk leo lor ăp trong tâm rlong rŏng dak, way tâm rnglăp, du nuih n’hâm rdâk njêng ƀon tơm,  neh dak nar lơn ma ndrŏng uĕh, nău rêh ƀon lan nar lơn ma hơm răm, rgâl mhe:

Wa Đinh K’re, Bí thư Đảng ủy xã Kon Pne, nkuâl Kbang, n’gor Gia Lai an gĭt: lah xã nkual jêr jŏt bah nkuâl Kbang, n’gor Gia Lai, yor kơt nê̆, đah nău ƀư lah nuĭh mât bôk kan bah xã, săk wa Đinh K’re nơm way kơt nti tĭng nău Wa kalơ nuih n’hâm dâk leo lor. Lah du đảng viên, Đinh K’re mô dơn kơl kônh wa tâm rnôk hun hao wăng sa, ma păng hôm nsrôih nkoch trêng rgŏ jă nuĭh ƀon lan tĭng jăp trong nchrăp bah Đảng, Pháp luật bah ngih dak n’hanh ăp trong leo tâm rlong rŏng dak tât bah nuĭh ƀon lan tâm rnăk wâl, ndŭl deh keh na. Tĭng wa Đinh Kre, kơt nti n’hanh ƀư tĭng nău mĭn, nuĭh n’hâm uĕh lŏng, trong gŭ rêh Hồ Chí Minh ăp gưl ủy, mpôl kan đảng n’hanh đảng viên ân n’hao nău gĭt êng, nău dơn kan ta lĕ pe nkô̆: Nti kơt Wa, ƀư tĭng Wa n’hanh dâk leo lor.

“Gâp saơ nău kơt nti n’hanh ƀư tĭng Wa hŏ dơi n’glăp tâm nău rêh bah kônh wa đŏng, tâm ban kơt rgŏ jă kônh wa tâm rnglăp. Săk ăp cán bộ, đảng viên nơm hŏ ƀư tĭng nău Wa gĭt tâm rnglăp, mpêt nkrem, way ntĭm nti kônh wa gĭt tâm kơl nsum rdâk njêng nău rêh mhe uĕh lăng lơn” .

Du bông nău rêh nău kan cách mạng, Kruanh Hồ Chí Minh way nkoch tât nkô̆ nău dâk leo lor bah năp mpôl bah nuĭh cán bộ, đảng viên, lor bôk năp lah dâk leo lor nău mĭn, nuih n’hâm uĕh lŏng, trong gŭ rêh. Đảng viên K’Nam, Ban Dân vận Huyện ủy Di Linh, n’gor Lâm Đồng an gĭt, ăp tâng jru nău mĭn  nê, tâm bah ri  aơ nơh, nô n’hanh ăp đảng viên êng tâm đơn vị way mô rlu kơt nti n’hanh ƀư tĭng nău Wa ta ăp ntil  nău kan, lơn lah tâm trong dâk leo lor ăp trong tâm rlong rŏng dak, way tâm rnglăp, du nuih n’hâm rdâk njêng ƀon tơm, neh dak nar lơn ma ndrŏng uĕh, nău rêh ƀon lan nar lơn ma hơm răm, rgâl mhe, lôch nê rgŏ jă nuĭh ƀon lan ta ntŭk kơt tĭng ƀư:

 “Đah aƀaơ 55 năm, jêng lah tâm năm 1969, lor rnôk tĭng drô phan, Kruanh Hồ Chí Minh hŏ an tay lam Đảng, lam ƀon lan, lam tahen he siƀŭt ntĭnh ntăn huêng khlay. aơ lah siƀŭt nchrăp lor lịch sử dŭt khlay, ndjăt luh ăp rsang rnglăy nuih n’hâm uĕh lŏng bok n’glang, tor luh trong rƀŏng hun hao an cách mạng Việt Nam nar aơ n’hanh let năp tay. Gĭt năl kloh nău nê, săk gâp nơm tâm ban  kơt ăp cán bộ, đảng viên ta ntŭk way nsrôih lĕ n’hâm suan he tâm nău kan, mô rlu nsrôih kơt nti n’hanh ƀư tĭng nuih n’hâm uĕh lŏng bah Wa”.

Wa Điểu Mbrâng, nuĭh Bu Nong, lah nuĭh geh nsing nơm ta ƀon Đắk R’Mon, xã Đắk R’Moan, nkual ƀon têh Gia Nghĩa, n’gor Dak Nông. Wa Điểu Mbrâng nkre rhơn n’hao lah ngoăy tâm 27 đại biểu bah nkual ƀon têh Gia Nghĩa râng Đại hội Đại biểu Mặt trận Tổ quốc Việt Nam n’gor Dak Nông tâl V, năm kan 2024-2029. 55 năm tĭng ƀư nău ntĭnh ntăn bah Wa Hồ, wa Điểu Mbrâng an gĭt, kônh wa ƀon lan nchih nkah nău ntĭm bah Wa. Kônh wa ƀon lan way tâm rnglăp, nsing nơm tâm nău rđău kan bah Đảng, mât uănh bah n’gâng kan. Kônh wa nsrôih tĭng ăp trong leo ƀư tâm rlong, ăp rơh rgŏ jă, lơn lah rơh rgŏ jă rdâk njêng ƀon lan mhe. Âk rnăk hŏ rong neh, rgop nar luh suan kan gay ƀư ntung trong. Kơt nti, ƀư tĭng nău Wa Hồ, kônh wa ƀon lan ta Dak Nông way tâm rnglăp, du nuih n’hâm rdâk njêng ƀon tơm, neh dak geh ndrŏng.

“Wa Hồ way rong an nău tâm rŏng jru an kônh wa ta Tây Nguyên n’hanh kônh wa he way nchih nkah nău ntĭm nti bah Wa Hồ. Kơt nti, ƀư tĭng trong gŭ rêh bah Wa, kônh wa ân way tâm rnglăp, du nuih n’hâm, nsing nơm n’hanh tĭng Đảng, Ngih dak. Kônh wa ƀon lan mbra nsrôih wăng sa, rdâk njêng ƀon tơm, neh dak nar lơn ma geh ndrŏng.”

Yuh Ham, 35 năm deh, lah du hê cán bộ Mặt trận xã Chư Á, nkual ƀon têh Pleiku, n’gor Gia Lai. Âk năm aơ, yuh mô rlu kơt nti n’hanh ƀư tĭng nău mĭn, nuih n’hâm uĕh lŏng Hồ Chí Minh, way ndơ̆ nău geh bah nuĭh ƀon lan dâk bôk năp. Đah nuih  n’hâm dơn kan âk, yuh nsrôih rgŏ jă, nkoch trêng kônh wa nsing nơm tâm gung trong, trong nchrăp, trong kơl bah Đảng n’hanh Ngih dak. Yuh way mâp, nkoch bri, ơh rblang nău ôp bah nuĭh ƀon lan n’hanh ntrŭt nsôr khân păng rong neh ƀư trong, tĭng ƀư ăp rnoh tât rdâk njêng ƀon  lan mhe. Nơm geh kơt nê, yuh hŏ rgop n’hao nău gĭt êng, tâm rnglăp nsum ƀon  lan ta ntŭk. Nkre yuh dơi ƀon lan dêh rŏng, uănh khlay n’hanh lah nuĭh ntĭt leo lor trong chrat ang tâm trong leo kơt nti n’hanh ƀư tĭng nău mĭn, nuih n’hâm uĕh lŏng Hồ Chí Minh ta ntŭk. Yuh an gĭt:

“Gâp way rgŏ jă ăp nuĭh ƀư ăp ntil uĕh lăng, gĭt tâm kơl nsum, n’hanh mô djăt tĭng ăp nău nsŭk nsôr têk klônh bah nuĭh mhĭk djơh. Tâm ăp nar lễ, gâp nkah kônh wa yông cờ gay mpơl nău rŏng dak n’hanh nkah gĭt ăp nuĭh dăng janh hŏ khĭt să rlă lŭ mât njrăng đăp mpăn dah rŏng, gay he geh nău rêh hơm răm, đăp  mpăn kơt nar aơ.”

Bah nuih n’hâm dêh rŏng Wa Hồ, hôm dơi hŭr tŏ yor nuih n’hâm nsan hao klaih rlău ach o bah nkual ƀon tơm geh âk nău way ơm cách mạng, nô A Lấu 38 năm deh, rnoi Xơ Đăng, xã Măng Bút, nkuâl Kon Plông, n’gor Kon Tum mô kă rnam gung trong ngai ngât n’hanh nău rêh rnăk wâl jêr jŏt jăp gơih kơt nti. Aƀaơ, nô lah cán bộ địa chính xã Măng Cành, nkuâl Kon Plông. Nô A Lấu lah rjăp, dơn geh Đảng, geh Wa Hồ mơ nsĭt tay hơm răm, gung trong rsong hăn dơh soih, nsĭt dak si, ntĭm nti… tât đah nuĭh Xơ Đăng ta Măng Bút. Yor kơt nê̆ dơi pah kan, rgop rdâk njêng ƀon tơm, nô A Lấu  way nsrôih tâm pah kan, nkre nsrôih kơt nti êng n’hanh ƀư tĭng trong gŭ rêh Wa Hồ:

“Tĭng ƀư rơh rgŏ jă “Kơt nti n’hanh ƀư tĭng nău mĭn, nuih n’hâm, trong gŭ rêh Hồ Chí Minh” cán bộ xã, thôn n’hanh lĕ rngôch kônh wa tĭng jăp da dê. Ăp năm, ta ntŭk an ƀư nău kơt nti ma nău ngơi rnoi mpôl đê̆ kơl kônh wa dơh djăt, dơh wât mpeh nkô̆ bah rơh rgŏ jă. Nău rêh nuĭh ƀon lan ta ntŭk lơn âk nsing tâm nău kan tuch tăm, nău dơn kan bah cán bộ mpôl hên lah nuĭh ntĭm leo, rgŏ jă kônh wa tâm rnglăp, nsing tâm gung trong bah Đảng, ƀư tĭng nău ntĭm nti bah Wa Hồ, kônh wa dơi kơt nti âk ntil nău mhe lơn, gĭt wât mpeh khoa học kỹ thuật gay hun hao wăng sa rnăk wâl.

Lah ntŭk gŭ nde cách mạng tâm rơh tâm  lơh mprơh Mỹ, buôn Pa, xã Cư Prao, nkuâl Mđrắk, n’gor Dak Lak hŏ lhut săk, rgâl ntô, nău rêh rnoi mpôl đê̆…. hŏ dơi rgâl, hun hao. Tâm buôn aƀaơ geh bơi 200 rnăk, rlău 800 nuĭh, lĕ rngôch ăp rnăk geh ti vi, ndeh honda, điện thoại da dê; dơi dŏng điện ngih dak, lĕ rngôch oh kon tâm buôn dơi hăn nti da dê.  Buôn Pa mhe dơi ntuh kơl nkra têh hvi 6 njăr trong đah rnoh jong rlău 6km, dŏng 1,2km n’gâng ŭnh “Mpoh ang trong ƀon” tă bah Tỉnh đoàn Dak Lak kan nsum đah Đoàn cơ sở công ty điện lực Dak Lak ƀư. wa Y Tuân Ksơr, Bí thư Chi bộ buôn Pa an gĭt:

        “Ntơm nơh nuĭh ƀon lan dŭt jêr jŏt, ntơm bah điện, trong. Aƀaơ nơm geh trong nchrăp trong kơl bah Ngih dak, ƀon lan hŏ geh điện, trong nhih dak si, nhih nti, ƀon lan mbrơi mbrơi ntơr uĕh. Nuĭh ƀon lan nsing nơm, djăt n’hanh ƀư tĭng nău Wa Hồ ntĭm, tĭng jăp Ăp quy định pháp luật bah Đảng n’hanh Ngih dak.