Ta nkual ƀon têh Buôn Ma Thuột, Bôk nău kan “Nar lam ƀon lan râng yŭr mham ŭch êng” năm 2023 wăch rgum rlău 600 nuĭh lah cán bộ, công chức, viên chức, rmôt vũ trang tât râng yŭr mham. Tă bah nĕ wăch rgum geh 459 đơn vị mham. Âk rơh râng yŭr mham ŭch êng, nô Nguyễn Văn Kiên, ta phường Tân Thành, nkual ƀon têh Buôn Ma Thuột nkoch:

“Gâp râng 25 tơ̆ yŭr mham hôm, nar aơ râng tay. Tă bah ăp rơh yŭr mham saơ nâm ơm, ăp rơh râng saơ răm rnôk dơi nkoch đah ăp nuĭh ŭch ntop kơl mham tâm ăp nău mbăn”.

Wa Ayun H’Hương, Kruanh Hội Chữ thập đỏ n’gor Dak Lak an gĭt, ăp năm dăch aơ, rnoh ngih pah kan, ntŭk kan, ngih măy, công ty, ngih sam ƀŭt ƀư ăp nău yŭr mham nar lơ âk tă bah nău ƀư kơt Lễ hội Xuân hồng, nar Pơh chăng, Hành trình đỏ... Ăp nar rgum yŭr mham lĕ nta an âk nuĭh dơi rgop nsĭt tay dơi geh nău rêh an ăp nuĭh ji dôl ŭch mham. Bôk nău kan nkah gĭt 23 năm nar lam ƀon lan yŭr mham ŭch êng rơh an nkoch trêng n’hao lơn tay nău ŭch, nkô̆ nău uĕh bah yŭr mham kơl nuĭh, rêng hvi ntrong leo yŭr mham tâm ntŭk gŭ rêh.

“Mpŏng ŭch đŏng nar aơ n’hanh ăp nar bah kơi tay nuĭh ƀon lan lam n’gor ƀư tĭng nău yŭr mham uĕh lơn. Tâm năm tât mpôl hên nkoch trêng mpeh nău yŭr mham ta n’gor gay trong kan yŭr mham ta n’gor nar lơ hun hao lơn tay”.

Bôk khay 4 mhe rlău, Ban ntĭm rđău yŭr mham ŭch êng n’gor Kon Tum ƀư rgŏ jă Nar lam ƀon lan yŭr mham 7/4 đah bôk nău: “Yŭr mham rih-Jao an nău rêh”. Tĭng nău mbơh ta ƀư rgŏ jă: tâm ăp năm bah năp, ntrong leo yŭr mham ŭch êng bah n’gor Kon Tum lĕ rgop uĕh an trong kan mât uănh, njrăng n’gang n’hanh n’hao săk soan nuĭh ƀon lan. Êng năm 2022 mhe rlău lam n’gor ƀư geh 34 rơh yŭr mham ŭch êng, wơt dơn rlău 6.800 đơn vị mham, geh rlău 136% rnoh an Ban ntĭm rđău ngih dak rgŏ jă yŭr mham jao an.

Ntrong leo yŭr mham ŭch êng lĕ hun hao lam hvi ta lĕ rngôch ăp nkuăl, nkual ƀon têh n’hanh ngih pah kan, ntŭk kan bah n’gor Kon Tum jêng du nău văn hóa uĕh. Wa Nguyễn Thị Hoài Ven, Kruanh Hội chữ thập đỏ, Groi kruanh Ban rnâng kan Ban ntĭm rđău yŭr mham ŭch êng n’gor Kon Tum an gĭt

“Năm 2023 Hội chữ thập đỏ n’gor Kon Tum lah ngih pah kan rnâng kan Ban ntĭm rđău mbra ƀư âk nău kan n’hanh bôk nău kan têh, kơt: Bôk nău kan Lễ hội xuân hồng, Nar lam ƀon lan yŭr mham kơl nuĭh, Hành trình đỏ... Nău rƀŏng bah năm 2023 mbra rgum geh đêt ngăn 7.200 đơn vị mham. Nuĭh ƀon lan aƀaơ lĕ wât jru đah nău yŭr mham kơl nuĭh”.

Ban ntĭm rđău rgŏ jă yŭr mham ŭch êng n’gor Kon Tum geh nău rƀŏng tâm năm 2023 rgŏ jă geh 1.500 nuĭh dăn râng yŭr mham n’hanh ƀư wơt dơn 7.200 đơn vị mham tâm di nău ŭch dŏng mham bah Ngih dak si Đa khoa n’gor gay kơl săm an nuĭh ji. Jêh ƀư rgŏ jă Nar lam ƀon lan yŭr mham nar 7/4, Hội chữ thập đỏ n’gor Kon Tum lĕ ƀư wơt dơn mham bah nuĭh yŭr mham ŭch êng n’hanh tâm khay 4 nsrôih rgŏ jă, ƀư wơt dơn 720 đơn vị mham.

Ntơm bah bôk năm, ta nkual ƀon têh Buôn Ma Thuột, n’gor Dak Lak lĕ rdâk ƀư bôk nău kan “Nar pơh chăng” rơh tal 15 ta Tây Nguyên. Ta nar rdâk ƀư rơh aơ lĕ geh rlău 600 sinh viên, nai ntĭm nti, cán bộ, y nai dak si dôl nti, pah kan ta Ngih sam ƀŭt Đại học Y dược Buôn Ma Thuột, n’gor Dak Lak râng yŭr mham. Lôch bôk nău kan lĕ dơn geh rlău 500 đơn vị mham, rgop tâm ntŭk mât prăp mham ngih dak. Lĕ geh 20 tơ̆ râng yŭr mham kơl nuĭh, nô Quốc Đình Khánh, Kỹ thuật viên trưởng, Khoa Xét nghiệm, Ngih dak si Đại học Y dược Buôn Ma Thuột lah:

“Aơ lah du nău ƀư dŭt n’hâm khlay, dŭt ŭch, geh nău kơl nuih, kơl âk nuĭh ji. Gâp du hê nuĭh kan dak si jêng oh wât kloh nău yŭr mham ŭch ngăn n’hanh mô khuch an nuĭh yŭr mham jêng oh ntrŭt đă lĕ rngôch ăp băl mom lah tŏng săk soan ri an râng yŭr mham”.

Bôk nău kan “Nar pơh chăng” rơh tal 15 dơi ƀư ta 3 ntŭk êng êng ta Tây Nguyên geh Ngih sam ƀŭt Đại học Tây Nguyên, nkuăl Cư M’gar n’hanh nkuăl Ea Kar bah n’gor Dak Lak. Đah nău mbơh “Yur mham kơl nuĭh, nău rêh bah băl n’hanh gâp”, bôk nău kan gay rêng lam hvi nău khlay kơl nuĭh, rgop an ntŭk mâp prăp mham ngih dak gay kơl săm ngăch an ăp nuĭh ji./.