Tết tât, bu ranh ƀon Y Thành ta xă H’Ra, nkuăl Mang Yang, n’gor Gia Lai way tât chop khâl, mbah rhơn nuĭh ƀon lan ta ntŭk. Lah nuĭh ntrong leo, nsing nơm tâm ƀon, Bu ranh ƀon way mô chuêl ntĭnh ntăn, ntĭm rđău nău uĕh mô lah nău di an kônh wa ƀon lan mô hăn tih trong, đăp mpăn ƀư sa, hun hao wăng sa, rgop soan ndrel Đảng, Ngih dak ndâk njêng ƀon tơm nar lơ ndrŏng uĕh. Bôk năm mhe, bu ranh Y Thành njuăl nău mbah rhơn Tết tât kônh wa: "Nar aơ bu ranh njuăl nău mbah rhơn tât đah kônh wa, năm mhe mâp âk nău lap, ƀư sa dơh uĕh, hơm răm, đăp mpăn. Kônh wa an tĭng uĕh nău ntrŭnh trong hăn bah Đảng n’hanh Ngih dak, an nsrôih pah kan jan sa uĕh ngăn, gay n’hao nău geh, n’hao naư rêh. tâm năm mhe dăn mbah rhơn kônh wa săk soan uĕh lăng, ƀư sa săk rnglăy, geh ndơ sa ndơ ntêm, nău rêh hơm răm, ăp jay rgâl mhe.... ndrel soan ndâk njêng ƀon lan tĭng đảng, Ngih dak".

Ta Buôn Drai Hling, xã Hòa Xuân, nkuăl ƀon têh Buôn Ma Thuôt, n’gor Dak Lak, ăp nuĭh gĭt da dê Y Duen Niê, nuĭh geh nău knơm tâm ƀon. Mô dơn geh kơl ƀon lan tâm ăp nău rêh jêng, wa Y duen Niê hôm nha lah Đảng viên geh nău kan ueh ta trong kan rdâk njêng n’hanh hun hao Đảng ta ntŭk kan ba dâng. Ta ăp nău kan, wa Y Duen Niê lĕ geh ƀư lôch ueh nău kan nơm da dê. Tĭng wa, nău dăch bên, kan jăp lah nău kan tơm gay ma sŏk nuih n’hâm ƀon lan ƀư tĭng . lăp năm mhe wa ŭch ƀon lan nơm nâp knơm tĭng Đảng, ngih dak. “Gâp geh âk nău knơm tâm năm mhe. Ŭch ƀon lan nơm ngăch dăng lăng ueh, pah kan  sâm geh. Ƀon lan way geh djăt tĭng pháp luật bâh Đảng n’hanh ngih dak. Hôm Đảng n’hanh ngih dak rĭ mât uănh tay nău rêh bâh ƀon lan  tâm nău hun hao wăng sa kơt tăm cà phê, mât chăm sầu riêng, mât rong kik djăr, ndrôk sŭr".

Wa Điểu Kêu, đảng viên, nuĭh nsing nơm ƀon Bu Ndrung, xă Dak Ndrung, nkuăl Đăk Song, n’gor Dak Nông ƀa ƀơ uănh nđôi ăp bôk nău kan nău mhe tă bah Đài TNVN n’hanh ăp ntrong mbơh nu naư mhe. Wa Điểu Kêu an gĭt, tă bah uănh nđôi nu naư mhe dak bah dih tâm năm 2023 geh âk nău rgâl, lam ntŭr neh n’hanh nkual geh âk jêr jŏt, yơn đah nău ntĭm rđău di bah Đảng, Ngih dak jêng dak he hôm e dơi mât đăp mpăn. Knơm nĕ, naư rêh, wăng sa bah kônh wa ta ƀon đăp mpăn n’hanh hun hao. Kônh wa wơt năm mhe tâm nău răm, nsing nơm. Wa Điểu Kêu nsing nơm tâm năm mhe neh dak mât uĕh tay hun hao đăp mpăn."Đah nău ntĭm rđău bah Đảng, Ngih dak, wăng sa, rêh jêng dak he gâp saơ dŭt đăp mpăn. Kônh wa ta ƀơn saơ dŭt rhơn đŏng, kônh wa đăp mpăn ƀư sa, hun hao pah kan jan sa. Tâm năm 2024, mpôl hên nsing nơm đah nău rđău bah Đảng, Ngih dak ri năm mhe neh dak he mbra hun hao đăp mpăn tay".

.Năm mhe Giáp Thìn 2024 geh n’gor Kon Tum uănh năl lah năm rhoăt ndăn, geh nău khlăy ngăn, ntop ƀư dơi Nghị quyết Đại hội 13 bâh Đảng, Nghị quyết Đại hội 16 Đảng bộ ngluh mbơh. Đah ăp nău mpŏng dŭt tơm khlăy mpeh nău wăng sa geh mbơh tơih tâm năm 2024, kơt; nău ngăch hun hao GRDP bâh n’gor geh bâh 10% let lơ; GRDP râng geh du hê rlău 63,7 rkeh prăk. Nău geh an tơm prăk ngih dak bâh 30 rmen prăk let lơ; lĕ rnoh prăk ntuh kơl ta lam ntŭk rêh jêng bâh 30 rbăn rmen prăk let lơ..gay ma dơi ăp nkô̆ mpŏng hun hao aơ, bâh ntơm ăp nar bôk năp, khay bôk năm bâh năm mhe 2024, UBND n’gor Kon Tum lĕ đă ăp gâl kan, ăp ntŭk mbơh tơih ƀư tĭng âk trong kan răng dăng gay ma ƀư lôch ăp nkô̆ mpŏng ngluh mbơh.

Nô A Phai, ƀon Tân Ba, xã Tê Xăng, nkuăl Tu Mơ Rông rnê âk ăp nău nău ma n’gor mbơh ƀư gay ma ƀư lôch ăp nkô̆ mpŏng hun hao, kơt lah: rgum, sŏk dŏng n’hanh dŏng an geh săk rnglăy ăp rnoh kan, nău dơi, nău geh bâh n’gor, ntrôl hun hao tơm ƀư dak si, tuch tăm dŏng công nghệ mhe, ndrel đah công nghiệp nkret ƀư, mât rbăy n’hanh n’hao nău khlăy ndơ văn hóa way ơm bâh ăp mpôl rnoi ta ntŭk..mpơl nău knơm bâh nơm, nô A Phai an gĭt, rnăk vâl tâm ban kơt ƀon lan ta ƀon tân Ba tâm năm mhe mbra nsrôih lĕ săk nơm, nsrôih geh gĭt nău mhe, gơih pah kan jan sa gay ma nău wăng sa rnăk vâl ntop ƀư lôch ăp nkô̆ mpŏng nsum bâh n’gor. “Gay ma bah ach o năp lor rnăk gâp mbra nsrôih tăm âk tơm cà phê, bum, sâm Ngọc Linh n’hanh hun hao tay ăp ntil tơm êng đŏng. Lah geh nău nơih rĭ mbra rvăt ntil ndrôk sŭr gay ma hun hao wăng sa, yơn lah yor trôk nar mih sial ta aơ nđik, dâng pih, dâng bri geh âk ntŭk mpêr n’gar văr ntŭk yor lah neh pah kan bâh ƀon lan, mô geh tach, mô geh ntŭk gay ma mbơk mât rong jêng lah jêr đŏng. Aƀaơ, gâp lĕ mĭn mhâm ƀư gay ma ăp nuĭh tâm rnăk vâl nău geh tât 10 rkeh lĕ bah ach o. Tâm năm mhe, gâp nchrăp mbra rgum pah kan tăm ăp tơm geh nău wăng sa âk gay ma nsĭt tay nău rêh sâm geh lơn an rnăk vâl”.

Lah n’gor geh âk jêr jŏt yơn năm bah năp, Kon Tum geh rnoh hao jêng 7,32% âk lơn rnoh hao jêng rĭng bah lam dak. Nău geh rĭng bôk nuĭh geh rlău 58 rkeh prăk. Aơ lah nău nsrôih dŭt têh bah Đảng bộ, n’gâng kan ƀon lan, tahen n’hanh nuĭh ƀon lan n’gor Kon Tum. Lah mpeh nău uănh bah Đảng, Ngih dak đah nuĭh ƀon lan nkual jru ngai, nkual rnoi mpôl đêt n’hanh ăp nău geh wăng sa-rêh jêng bah n’gor, wa A Ninh, Kruanh Jrô kan dân tộc nkuăl Kon Plông, n’gor Kon Tum răm rhơn an gĭt: "Tâm năm bah năp, knơm nău mĭn bah Đảng n’hanh Ngih dak lĕ ntop kơl âk an kônh wa kơt tơm tăm, mpa rong, ntop kơl ndâk ƀư ntung trong. Kônh wa rnoi mpôl đêt rêh ta ntŭk dŭt răm, nsrôih yor lĕ dơi ngih dak ntop kơl, lơn lah hun hao ƀư sa an kônh wa. Tâm năm mhe 2024 aơ, dŭt ŭch Đảng, Ngih dak uănh mĭn tay, kơl an kônh wa hun hao wăng sa âk lơn tay".

Bâh năm 2021-2023, lĕ rnoh prăk bâh bôk nău kan nkô̆ mpŏng ngih dak n’huch ach o nâp nâl ntuh kơl ta nkuăl chư Pah lah bơi tât 15 rmen prăk. Bâh nĕ, nkuăl pă an ăp xã, nkuăl têh kơl an ndrôk deh kon, phân poh, tơm ntil n’hanh ndơ dŏng pah kan jan sa...an rnăk ach o. Nkre lah, ntrôl dăng mbơh tơih an ƀon lan ach o gĭt vât hun hao, bah ir hôm nău mĭn kâp knơm ta nău kơl an bâh ngih dak n’hanh ntŭk rêh jêng. Bâh nĕ, nău kan n’huch ach o nâp nâl lĕ geh nău dơi âk, năm 2023, lĕ rnoh rnăk ach o ta lam nkuăl hôm nha 1.488 rnăk geh tât 7,16% hŭch 3,82% đah năm 2021. Nô Rơ Châm Thuân- xã Ia Ka, nkuăl Chư Păh an gĭt, bôk nău kan n’huch ach o nâp nâl lĕ njêng nău knơm nâp jăp kơl an ƀon lan rnoi Jrai ta ntŭk hun hao lơn.“Tâm năm 2023 mhe nơh, rnoh ndơ tăm geh cà phê lah hao khlăy ƀư an nău rêh bâh ƀon lan geh rgâl lơn đah ăp năm ba năp. Yor dak tŏ hôm nha mô tŏng jêng lah ƀon lan ƀư tăm ba du yan dơm, n’hanh rgum mât tơm cà phê, sầu riêng mô lah ăp ntil tơm tăm êng gay ma n’hao nău geh. Ngih dak lĕ mât kơl ngih jay gŭ an ăp rnăk jêr jŏt. Tâm năm 2023 lĕ geh rdâk njêng mhe 10 ngih jay tâm xã Ia Ka aơ, ntop kơl an ngih jay gŭ an ƀon lan jêr jŏt tâm xã Ia Ka aơ. Tâm năm 2024 mpôl hên mbra ƀư trong ăp ƀon, nĕ lah ƀon Bui, Joăng, Build...dăn ŭch n’gâng kan ta ntŭk mât kơl tât nău n’hao nkra, rdâk njêng trong hăn dơh nơih gay ma nău hăn nsong ueh aih lơn”.

Xă Phú Hội, nkuăl Đức Trọng, n’gor Lâm Đồng geh rlău 42% ƀon lan lah nuĭh rnoi mpôl đêt, tâm nĕ dŭt âk lah nuĭh K’Ho. Knơm ntrôl nuĭh ƀon lan râng nkra njêng tuch tăm công nghệ mhe, nkra njêng lŏ mir tĭng n’hao khlay ntŭk tăch jêng Phú Hội lĕ ndơ̆ dĭng lĕ rnoh nuĭh ƀon lan nkra njêng tĭng sam ƀŭt nchăm ndơ hao 900 rnăk. Tâm rgop nkra njêng đah doanh nghiệp HTX n’gluh an ndơ lŏ mir đăp mpăn, nsĭt tay nău geh âk an nuĭh ƀon lan. Tĭng wa Kră Jăn K’Suynh, Groi kruanh UBND xă Phú Hội, lam kon nuĭh aƀaơ geh 6.700ha rnoh neh tuch tăm lŏ mir, tâm nĕ geh rlău 2.700ha nkra njêng lŏ mir tĭng trong công nghệ mhe. Aơ lah nău khlay an ƀon lan pơk hvi tay âk ntrong kan tâm rgop nkra njêng đah nuĭh ƀon lan n’hanh doanh nghiệp, ndơ̆ wăng sa bah xă hun hao âk lơn tay tâm năm mhe 2024 aơ."Ƀon lan mpôl hên nkra njêng lŏ mir lah rnoh neh tơm tăm jŏ năm tăm cà phê n’hanh tiêu, rnoh ƀa ƀă rgum hun hao ăp ntil biăp tĭng trong tâm rgop đah ăp HTX, rmôt kan ndrel. Knơm ƀư tĭng tâm rgop nkra njêng aơ ntŭk tăch ndơ kơt tuch tăm lŏ mir bah kônh wa geh nâp nâl. Tât aơ tay, xă nchrŏng tay trong an ƀon lan nkra njêng tĭng sam ƀŭt nchăm ndơ, ntrôl dăng ăp trong tâm rgop nkra njêng n’hanh tăch ndơ lŏ mir gay nsĭt tay nău geh đăp mpăn an nuĭh ƀon lan"

Tổ dân phố Ea Nur, nkuăl têh Pơng Drang, nkuăl Krông Buk geh 317 rnăk, geh rlău 1.500 nuĭh, tâm nĕ geh 2/3 lah nuĭh rnoi đê̆, dŭt âk lah Rđe. Bâh geh nău mât kơl bâh Đảng, ngih dak n’hanh n’gâng kan ta ntŭk, nuĭh ƀon lan gơih pah kan jan sa, hun hao wăng sa. Ăp năm dăch aơ, nău wăng sa hun hao, nău rêh bâh ƀon lan ăp nar lơ ma geh n’hao. Âk rnăk vâl rdâk ƀư ngih jay nâp nâl, rvăt năp ndeh ô tô, ndeh máy n’hanh ăp ntil ndơ dŏng tâm nău rêh. Ndrel đah nĕ, ăp ntil nău mpeh rnă njrăng, văn hóa, trong hăn, trong đèn mpoh ang lĕ geh mât kơl, ntuh kơl. Wa Y Lina, kruanh tổ dân phố Ea Nur an gĭt, nău mât kơl, ntuh kơl bâh Đảng n’hanh ngih dak kơl an ƀon lan knơm, đăp mpăn ta nău pah kan jan sa."Dŭt tâm di đah nău knơm bâh Đảng, ta ngih dak bâh nơm. way geh mbơh tơih an ƀon lan an geh ƀư tĭng nău kơl bâh Đảng, trong kan bâh ngih dak, mât nău way rêh bâh nuĭh Rđe nơm. Way geh ƀư tĭng, hăn kan di mô geh djăt nău mô mplư rlăm, ntrŭt leo tĭng nău mô ueh mô di. Nuĭh tâm thôn ƀon rĭ gơih pah kan jan sa, nău rêh ueh lơn".