VOV4.M’nông: Pơh bah năp, ndrel đah lam dak, ăp n’gor tâm nkual Tây Nguyên lĕ an kon hŏk plơ̆ tay ngih sam ƀŭt tâm nu nău nâm ơm mhe, tŏng ăp đăp mpăn njrăng n’gang srê Covid-19. Bôl ndrĭ, me bơ̆ mô lĕ rvê rnôk ndơ̆ kon tât ngih sam ƀŭt.

          Gay me bơ̆ n’hanh kon hŏk đăp mpăn, ăp ngih sam ƀŭt lĕ pă ntŭk êng gay wơt ăp oh tĭng jrô nti, ntop kơl, ntĭm kon hŏk ăp trong njrăng n’gang srê. Nai Phạm Thị Thanh Thủy, Hiệu trưởng ngih sam ƀŭt Tiểu học Ngô Quyền, Nkual ƀon têh Buôn Ma Thuột, n’gor Dak lak an gĭt:

          “Êng đah kon hŏk jrô 1, ngih sam ƀŭt lĕ geh nău dăp an rmôt nai chủ nhiệm ăp nai mbra dâk bah năp mpông pêr ngih sam ƀŭt gay wơt ăp oh. Jêh rnôk uănh duh săk an ăp oh gŭ ta ntŭk tâm ƀah 1 mét ăp oh lăp jrô nti. Uănh nsum ôi aơ rlău 90% ăp oh tât ngih sam ƀŭt”.

Bôl lĕ geh nău nchrăp tâm nău mĭn rnôk an kon plơ̆ tay ngih sam ƀŭt me bơ̆ rvê yor kon se mầm non, tiểu học mô dơi chuh vaccine, mô wât đah gŭ tâm ƀah jêng dŭt jêr gay ăp kon tĭng uĕh nău ntrŭnh njrăng n’gang srê. Yuh Hoàng Thị Kim Loan, me bơ̆ ndơ̆ kon tât ngih sam ƀŭt mầm non Tân Thành, nkual ƀon têh Buôn Ma Thuột, n’gor Dak Lak an gĭt:

          “Gâp dŭt rvê đŏng tâm nu nău srê aơ hôm F0 dŭt âk, an mon hăn ri mê̆ đah rnăk wâl dŭt rvê yơn tât rnôk mon tât ngih sam ƀŭt hăn nti gay năm taơ lăp jrô 1. Jêng nchrăp gri dak êng êng an mon, bok put mbung, bôk jŭt măt êng gay mon puh măt, mô lah ty krêp dak ri jŭt”.

         Mông nti ta jrô lá 1-ngih sam ƀŭt Mầm non Hoa Hồng-Pleiku

          Rnôk ngih sam ƀŭt Mầm non Hoa Hồng, Tp Pleiku, n’gor Gia Lai pơk mpông tay, yuh Huỳnh Thị Thu Hà ndơ̆ 2 hê kon nơm tât ngih sam ƀŭt. Ăp ôi, yuh an ăp kon rsŭng mbung đah dak bôh, uănh duh săk, wăn bok put mbung n’hanh gri dak êng tât jrô nti. Tĭng yuh Hà, bah nar plơ̆ tay ngih sam ƀŭt, ăp mon lĕ răm, rhơn; me bơ̆ lĕ bah nău jêr jŏt mât kon se:

          “Gâp saơ ta ngih sam ƀŭt mầm non, nău răk rao, ri ăp nai ƀư dŭt uĕh hôm. Lor rnôk ăp oh tât jrô nti, ăp nai lĕ răk rao kloh uĕh. Ăp nar, ăp nai an kon se ƀa ƀơ ngêt dak, rao ty puh kaman. Gâp saơ ăp nuĭh kơt dơi chuh vaccine lĕ hôm, me bơ̆ an ntop kơl tay vitamin, canxi gay ăp mon n’hao dăng chŏl nău ji, njrăng n’gang srê. 2 oh ngih gâp bah rnôk dơi hăn nti, sĭt răm ngăn”.

Wa Trần Thị Thủy-Hiệu trưởng Ngih sam ƀŭt Mầm non Hoa Hồng nkual ƀon têh Pleiku, n’gor Gia Lai an gĭt, rnôk ƀư nti rgum, ngih sam ƀŭt lĕ ƀư tŏng ăp ăp trong đăp mpăn njrăng n’gang srê Covid-19 tĭng nău ntĭm bah nău kan dak si n’hanh nău kan ntĭm nti. Nău wơt n’hanh mplơ̆ sĭt kon se dơi pă trong hăn bah ntŭk mpông pêr ngih sam ƀŭt. Tâm jrô nti, kon hŏk wăn bok put mbung n’hanh gŭ tâm ƀah tâm ăp nău ƀư pâl rlưn, hăn bah dih:

“Nchrăp an nâm ơm mhe tâm nău ƀư bah năp tay, ri ngih sam ƀŭt mbra ƀư uĕh trong kan nkoch trêng đah me bơ̆. Lơn lah đah kon se 5 năm deh, gay nchrăp nuih n’hâm, nău wât n’hanh nău blău an ăp băl lăp jrô 1 nâp nâl ngăn ri nkre ƀư trong kan njrăng n’gang srê nkre mât uănh, ntĭm nti kon se, an geh nău hăn ndrel đah me bơ̆ n’hanh ngih sam ƀŭt”.

Kon hŏk ta Dak Lak dơi uănh nđôi duh săk lor rnôk lăp jrô nti

Lam n’gor Gia Lai lĕ geh 253/257 ntŭk ƀư an kon se mầm non nti rgum. Rlău bơi 1 pơh, lĕ geh 85% kon se tât ngih sam ƀŭt. Uănh nsum, ta ăp nkuăl, nkual têh, rnoh kon se mầm non plơ̆ tay nti dŭt âk. Đah nău ntĭm nti geh rlău 1/4 tâm rnoh rlău 14 rbăn kon se hăn plơ̆ tay ta 36 ngih sam ƀŭt. Đah nău ntĭm nti đăp mpăn, rnoh kon se hăn nti dôl dơi hao tĭng nar. Tĭng wa Bùi Khoa Nghi-Groi Kruanh N’gâng kan ntĭm nti Gia Lai, nău an kon se ơm hăn nti tay lah nău dŭt khlay:

“Nău kan ntĭm nti lĕ ntĭm du đêt nkô̆ nău an njrăng rnôk kon se hăn nti tay, đăp mpăn njrăng n’gang srê rnôk mât rong, ntĭm nti kon se mầm non; ntĭm rđău ăp ntŭk ntĭm nti ƀư trong nchrăp rdâng đah ăp nu nău geh srê. Nău kan ntĭm nti nsrôih mô thơ tha gay ndơ̆ kon hŏk plơ̆ tay ngih sam ƀŭt, nta an nơih ngăn an kon se râng ăp nău ƀư ntĭm ntĭm nti”.

Gay ƀư ntĭm nti rgum đăp mpăn n’hanh săk rnglăy, bah năp nĕ n’gâng kan ntĭm nti n’gor Dak Lak lĕ ƀư ăp mpôl hăn uănh nđôi ngăn ăp ngih sam ƀŭt, đă đăp mpăn ăp ndơ, trong ƀư uĕh ngăn nău njrăng n’gang srê. Năm nti 2021-2022, n’gor Dak Lak geh rlău 1.000 ngih sam ƀŭt đah rlău 450.000 kon hŏk ta ăp gưl nti. Rnôk aơ lĕ rngôch cán bộ, nai, nuĭh kan tâm nău kan ntĭm nti Dak Lak lĕ dơi chuh đêt ngăn 2 nglai vaccine njrăng n’gang covid-19 n’hanh geh rlău 20% lĕ dơi chuh nglai 3./.

          Nuĭh rblang: Y Sưng Phê Ja