Mât uĕh nău way ơm tâm rnglăp, đah nuih n’hâm tâm yô̆ tâm kơl, tâm pă, N’gor ủy Dak Nông rgŏ jă rơh rgop kơl ƀon lan geh khuch khat yor phŭt mrô 3 ƀư. Jêh ƀư rgŏ jă, Ủy ban MTTQ Việt Nam n’gor Dak Nông lĕ dăn ntop kơl 1 rmen prăk. N’gor ủy Dak Nông kuăl jă ăp rơh kơn nuĭh ƀon lan tâm n’gor ndrel ty, rgop soan, geh đêt rgop đêt, geh âk rgop âk, ndrel ntop kơl gay kơl ƀon lan ăp n’gor geh khuch yor phŭt mrô 3 rlet rlău jêr jŏt, mkra kuch khat jêh phŭt. N’gor Dak Nông jao an Ủy ban Mặt trận Tổ quốc Việt Nam n’gor ƀư ntung nthoi, wơt dơn rgop kơl gay ntop kơl ƀon lan geh khuch, đăp mpăn ngăch, săk rnglăy. Wa Trần Minh Quân, Groi kruanh Ủy ban MTTQ Việt Nam n’gor Dak Nông an gĭt, ta năp măt, n’gor dăn ntop kơl 1 rmen prăk.

Bôl lah n’gor hôm e jêr jŏt, yơn mât uĕh nău way ơm bah rnoi nuĭh tâm rnglăp, tâm yô̆ tâm kơl, dơi nău ntĭm rđău bah rnâng kan N’gor ủy ri Ủy ban MTTQ n’gor kuăl jă, ăp rơh kơn nuĭh ƀon lan ta lam n’gor. Ăp nuĭh ƀon lan geh ndơ ri rgop kơl âk lơn, ăp nuĭh mô geh đêt lơn ri rgop du gâl, ntêm nkrem du gâl gay kơl kônh wa ta mpeh Bắc geh khuch yor trôk nar, phŭt sial lơh.

Du nău ƀư wăch rgum nău uănh tât bah nuĭh ƀon lan Buôn Ma Thuột, n’gor Dak Lak, nĕ lah ƀư ăp “Ndeh mô sŏk prăk” rdêng ndơ kơl ƀon lan nkual mpeh Bắc. Nô Bùi Xuân Phong, nuĭh tơm ndeh Phong Thương, hăn trong Thái Bình-Buôn Ma Thuột an gĭt, ăp “Ndeh mô sŏk prăk” gay ntop kơl rdêng lĕ rngôch ndơ rgop dơi ndơ̆ ăp n’gor Thái Nguyên, Lào Cai, Yên Bái... gay ntop kơl nuĭh ƀon lan.

Geh dŭt âk ndeh dôl kâp ta bah dih, đah nuih n’hâm nsum lah 3 mông kêng măng 14/9 ri mpôl ndeh hăn bah aơ hăn ăp n’gor mpeh Bắc. Ta aơ tĭng nuih n’hâm lah moh ndeh bêng mbra hăn dâl. Dŭt răm yor knŭng bah 8 mông măng nđaơ mpôl hên hăn yơn tât ôi aơ ri kônh wa Dak Lak hăn kơl dŭt âk. Ta năp măt lah uĕh nuih n’hâm bah ăp nuĭh.

Âk nuĭh ƀon lan tât kơl, bah ăp oh kon hŏk, ăp kônh yơn mât uănh, pah kan, tahen, n’hanh ăp u che ranh. U Trần Thị Cảnh, 81 năm deh, ta nkual ƀon têh Bà Rịa, n’gor Bà Rịa-Vũng ầu, an gĭt: U dôl hăn Dak Lak chop sau. Rnôk gĭt nău mbơh bôk nău kan ri lĕ đă sau rdêng hăn rwăt mì tôm gay kơl ƀon lan nkual dak lip.

Rngot ngăn, mô gĭt m’hâm ƀư, gâp ranh hôm. Saơ tâm mạng xã hội mbơh nău ƀư aơ jêng gâp ƀư dâl, rgop du đêt gay tâm pă đah kônh wa.

Nău ƀư tâm kơl ƀon lan nkual dak lip mpeh Bắc ƀư mô kơp măng nar. Ndăn măng, mpôl nuĭh hôm e hăn tât nkual Quảng trường 10/3, nkual ƀon têh Buôn Ma Thuột, n’gor Dak Lak gay rgop ăp trhùng mì tôm, dak ngêt, ndơ kro, phe, kho ao, ao n’ông, dak toh gay njuăl ăp “ndeh mô sŏk prăk” gay njuăl kơl ƀon lan mpeh bah lơ dôl khuch mbăn yor phŭt Yagi. Ndrel sai n’hanh kon jêt rdêng kho ao tât ntŭk rgum yuh Lê Thị Bảo Hiên, phường Tân Lợi, nkual ƀon têh Buôn Ma Thuột nkoch:

Oh saơ kônh wa ta Buôn Ma Thuột nchih, ôi aơ hăn kan oh mư gĭt nău aơ jêng hăn kan sĭt lah măng oh ndăn rgum kho ao oh. Ndŭl ri ji ngot mô hŏ geh ndơ sa. Oh ŭch njuăl nuih n’hâm bah nuĭh kon Buôn Ma Thuột tât ƀon lan nkual mpeh Bắc. Mpŏng kônh wa dơi đăp mpăn.

Đah nău way “Nuĭh geh soan rgop soan, nuĭh geh ndơ rgop ndơ”, nău rdêng ndoh ndơ ăp ndeh rdêng ndơ têh gay ngăch ndơ̆ mpeh Bắc dơi ƀư ngăch. Jŭt ndal dak rhal, ngêt dak, nô Nguyễn Văn Cơ ta phường Tân Lợi, nkual ƀon têh Buôn Ma Thuột nkoch:

Gâp răk ta fecebook saơ nău mbơh đă druh ndăm yơk ndơ, ơm hăn ta aơ kơl geh du đet an ăp nuĭh. Geh 3 mông hôm, âk oh nô yơk lor geh âk bôk ndeh hôm. Saơ rngot, yô̆ an nuĭh mpeh Bắc. Moh ndơ geh dơi kơl ri kơl, moh ndơ dơi ƀư ri ƀư.

Knŭng tâm du măng nar, nuĭh ƀon lan Dak Lak lĕ rgop geh 5 bôk ndeh, rĭng du bôk ndeh bơi 20 tấn ndoh ndơ dŏng gay rdêng tât kônh wa ta ăp n’gor mpeh Bắc dôl geh khuch mbăn yor dak lip.