Năm nti aơ, lam n’gor geh bơi tât 500 rbăn kon hoc ăp gâl nti, tâm nĕ kon hoc rnoi đê̆ geh rlău 35%. Nar khai giảng năm nti mhe 2024-2025 ta ngih nti THPT Dân tộc nội trú Nơ Trang Lơng, nkuăl ƀon têh Buôn Ma Thuột, n’gor Đăk Lăk, ngih nti lĕ uănh năl nău kan tơm khlăy lah n’hao nău dơi ntĭm nti n’hanh ntĭm nti tơm khlăy. Ngăn lah ngih nti uănh khlăy n’hanh joi trong mbơh tơih săk rnglăy an ntĭm nti way êng đah ngih nti nội trú nĕ lah ntĭm nti rnoi đê̆ n’hanh ntĭm nti văn hóa rnoi đê̆ tâm ngih nti. Rơh khai giảng năm nti 2024-2025, ta ăp ngih nti bâh ta nkual tơm tât ăp nkual njônh ngai, nkual ƀon lan rnoi đê̆ lĕ geh ƀư ueh, khlăy n’hanh njêng nău gơih nđơr an nai nti n’hanh kon hoc n’gor Đăk Lăk tâm năm nti mhe.

Ôi 5/9, rlău 400 rbăn kon hŏk ta n’gor Gia Lai lĕ nsrôih râng  ƀư năm nti mhe 2024-2025. Ta Ngih sam ƀŭt Tiểu học Võ Thị Sáu, nkuăl ƀon têh Pleiku, n’gor Gia Lai, Hội đồng Đội Trung ương (mpeh tâm Trung ương Đoàn TNCS HCM) lĕ rgŏ jă bôk nău kan Đội n’hanh ntrong leo kon se năm nti mhe 2024-2025 n’hanh an 526 bản đồ Việt Nam ndrel âk nklâm ndơ geh nkô̆ nău an kon hŏk ngih sam ƀŭt kơt 1.000 khăn quảng đỏ, 13 cờ Đội, ndrel đah âk ndoh ndơ nti n’hanh ntŭk pâl rlưn an kon se đah dĭng lĕ khlay rlău 256 rkeh prăk. Năm nti mhe 2024-2025, n’gor Gia Lai geh 759 ntŭk ntĭm nti rlău 400 rbăn kon hŏk ta ăp gưl.

 Tâm ôi nar naơ đŏng 5/9, rlău 7 rbăn kon hoc n’hanh ăp nai nti 29 ngih nti ta nkuăl Kon Plông, n’gor Kon Tum lĕ tâm ndrĭh ƀư lăp năm nti mhe. Nău khlăy êng geh ƀư ta âk jrô nti lôch rơh khai giảng lah ăp oh kon hoc geh uănh njrăng gĭt năl rơh n’gơ neh. Nai nti Lê Văn Đồng, groi kruanh ntŭk kan ntĭm n’hanh nti nkuăl Kon Plông, an git, uănh năl rơh n’gơ neh lah ntil nău tât dŭt jêr njrăng mbơh n’hanh mbra ƀư ăp nău khuch khat jêr njrăng, ta năp năm nti mhe 2024-2025, n’gâng kan ntĭm ntu nkuăl lĕ nsrôih tâm rgop đah ăp ntŭk kan têh njrăng rdâng đah ăp rơh n’gơ neh an ăp oh kon hoc n’hanh nai nti.