Liên đoàn lao động  n’gor Gia Lai tâm rgop đah UBND n’gor Gia Lai ƀư rơh rgŏ jă khay pah kan mpeh mât đăp mpăn nuĭh kan n’hanh khay mât kơl an nuĭh pah kan năm 2023. Ntŭk kan leo ăp nău kan kơt: rơh ntơm pơk tâm rlong bóng bàn tâm nuĭh pah kan, nuĭh kan lam n’gor tal 5, pă ndơ an ăp đoàn viên mom ndăm geh nău ji hô, geh nău rêh jêr jŏt; pă an 11 ngih “mái ấm công đoàn” an nuĭh pah kan mô geh nuĭh jay gŭ...wa Rơ Ma Nga, groi kruanh Liên đoàn lao động n’gor Gia Lai an gĭt: Gay ma ƀư na nê̆ bôk nău kan năm “mât kơl nău pah kan, nău rêh an nuĭh pah kan, nsrôih ƀư lôch âk ăp nkŏ mpŏng, nău kan bâh Nghị quyết Đại hội 12 Công đoàn Việt Nam” đah nău kan,  bâh bôk năm liên đoàn lao động n’gor lĕ ntrŭnh săm ƀŭt ntĭm leo, mbơh tơih mpeh nău mât kơl nău rêh ndơ dŏng, nău mĭn an đoàn viên, nuĭh pah kan.

“ Liên đoàn lao động n’gor Gia Lai way geh uănh khlăy tât nău mât chăm kơl an nău geh bâh đoàn viên n’hanh nuĭh pah kan, mpơl bâh nău mât kơl mpeh ndơ dŏng, mât kơl mpeh nău mĭn, mât kơl mpeh nău dơi chính trị an đoàn viên n’hanh nuĭh pah kan. Bâh nĕ, ntŭk kan lĕ ntĭm đă ăp gâl kan công đoàn rgâl mhe mbro, mĭn kan mhe, mpeh nău leo mbơh tơih, ƀư tĭng đah âk nău kan na nê̆. Ntŭk kan lĕ n’hanh dôl, way geh uănh joi mĭn kan, ngluh mbơh n’hanh mbơh tơih ăp trong kan ueh di ngăn gay ma mât chăm geh săk rnglăy nău dơi geh ngăn bâh đoàn viên, nuĭh pah kan, rnoh kan khlăy bâh ntŭk rêh jêng”.

Yuh Nhàn ta ƀon Breng, xă Ia Pết, Đăk Đoa, Gia Lai aƀaơ lah kruanh rmôt lô 4, ntŭk tăm prit Hưng Sơn, xă Ia Pết. Năm aơ lah năm tal 3 yuh Nhà an pah kan ta aơ. Yuh an gĭt, tâm ăp rơh lễ, lĕ rngôch 800 phung pah kan dơi an rlu, dơi an ndơ, mô lah dơi an prăk măt gay ăp nuĭh răm rlu lễ đah rnăk wâl. Năm aơ, yuh dơi rlu 2 nar, yuh n’hanh rnăk wâl nchrăp ƀư rlu geh nkô̆ nău:

“Công ty uănh tât nuĭh pah kan, kônh wa ta ăp ƀon lăp kan dơi uănh tât, tâm pă, rnôk kop ji dơi uănh kơl, mpôl hên dŭt đăp mpăn rnôk kan ta công ty. Di lễ 30/4 n’hanh 1/5 công ty an nuĭh pah kan rlu, geh an ndơ mô lah ntop kơl prăk jêng kônh wa đăp mpăn pah kan, rgop soan an công ty hun hao, nsĭt tay nău kan đăp mpăn an kônh wa, kơl kônh wa geh prăk gay jŭt jăng ach o, jêng mpôl hên hăn ndrel, tĭng đah công ty, an công ty hun hao nar lơ têh lơn”.

Ăp năm dăch aơ ta n’gor Kon Tum geh âk nuĭh pah kan nuĭh Xơ Đăng lah êng n’hanh nuĭh pah kan nuĭh rnoi đê̆ ta ntŭk lah nsum lăp pah kan ta ăp ngih máy, nông trường. Ndrel đah nău geh đăp mpăn, nău rêh rnăk vâl geh rgâl rĭ nău tât pah kan lĕ kơl an nuĭh pah kan rnoi đê̆ rgâl nău mĭtâm nău pah kan jan sa. Nô A Rổi, groi rmôt pah kan mbrô 1, công ty TNHH Một thành viên cà phê 704 ta nkuăl Đăk Hà an gĭt: Rmôt pah kan bâh nô geh 93 nuĭh kan nuĭh Xơ Đăng, aƀaơ dôl geh mât chăm rlău 78ha cà phê tăm năm tal 5. Nău tât pah kan lĕ kơl an ăp nuĭh kan rgâl nău pah kan, trong pah kan n’hanh ngăn lah geh gĭt ăp nău khoa học kĩ thuật gay ma dŏng tâm nău pah kan mât rong n’hao nău geh an rnăk vâl.

“Bâh ntơm lăp pah kan ta Công ty TNHH Một thành viên cà phê 704 rĭ cán bộ tât jur tâm ƀon ntĭm mbơh ƀon lan nău mât chăm n’hanh mât cà phê, bâh nĕ nău geh bâh ƀon lan ăp nar lơ ma hao. Năm aơ, nuĭh pah kan nău geh dŭt đê̆ geh klâp ma bâh 40-50 rkeh prăk/hê. Ƀon lan uănh năl: Đảng, ngih dak dŭt mât uănh tât ƀon lan, ntĭm đă ƀon lan nău pah kan jan sa, hun hao wăng sa, nsrôih kơl an ƀon lan tâm nău rêh jêng, mbơh tơih an ƀon lan an geh tâm rnglăp, tâm kơl ndrel tâm nău rêh jêng n’hanh tâm nău pah kan. Rnôk lăp pah kan ta công ty nuĭh kan geh gĭt mpeh khoa học kĩ thuật mhe yor nĕ nuĭh kan dŭt nđơr ngăn. Dŭt lah ueh Đảng, ngih dak, công ty lĕ mât kơl tât ƀon lan tâm ƀon geh nău kan đăp mpăn, nău rêh rgâl mhe ăp nar”.

 Bơi 8 năm pah kan ta Công ty Cổ phần Pâl nđaih sinh thái Ko Tam ta nkual ƀon têh Buôn Ma Thuột, Dak Lak, yuh H Sinh Êban, ta ƀon Kmrơng Prong B lĕ geh nău rêh đăp mpăn. Yuh an gĭt, bah rnôk lăp pah kan, yuh dơi công ty tŏng ăp nău dơi geh đah mât uănh săk soan ăp rơh, tiăr nti n’hao hăr ty kan. Công đoàn công ty ntop kơl an manh prăk mô sŏk prăk kon gay ƀư jay, mât rong oh kon hăn nti.

“Tâm rnôk pah kan kan ta aơ, gâp dơi tiăr nti, ntĭm nti âk nău blău kơt nkoch mpeh văn hóa rnoi mpôl đêt an năch dơi âk lơn. Ndrel đah nĕ nău rêh n’hanh wăng sa rnăk wâl geh hun hao uĕh lơn. Knơm geh nău kơl bah công ty ri wăng sa rnăk wâl mbrơi mbrơi đăp mpăn, bah nĕ đăp mpăn pah kan n’hanh tĭng đah công ty.

Lah ngoăy tâm âk nkuăl geh kơp dơn tâm di đah nkual ƀon lan mhe dŭt ơm ta Tây Nguyên, ndrel đah nău rdâk njêng n’hanh hun hao n’hao ăp nău mpŏng kan, nkuăl Đơn Dương n’gor Lâm Đồng lĕuănh khlăy nău kan kơl an rdâk njêng ngih gŭ an ăp rnăk ach o, jêr jŏt ta ntŭk. Jut jăng ngih truh sat lah ngoăy tâm âk nău mpŏng kan khlăy mpŏng tât nău kan rdâk njêng nkual ƀon lan tĭng nău mhe. Tâm ba năp nơh, nkuăl Đơn Dương n’gor Lâm Đồng lĕ rgŏ jă nău kơl an bâh ăp ntŭk kan công đoàn, ăp doanh nghiệp n’hanh nuĭh lŏng nuih n’hâm tâm rgop prăk kơl an nuĭh ach o n’hanh mbơh tơih kơl ngih jay gŭ an rbăn rnăk ach o ta ntŭk. Kanŭng kơp êng tâm năm 2022, Ủy ban MTTQ nkuăl Lạc Dương lĕ rgŏ jă geh 1,7 rmen prăk ta rnoh prăk tâm rgop. Bâh rnoh tâm rgop kơl aơ, ntŭk kan lĕ geh ƀư rdâk njêng 21 ngih tâm rnglăp đah rnoh khlăy 1 rmen prăk, nkra mhe 3 mblâm ngih tâm rnglăp đah rnoh khlăy 55 rkeh prăk an ăp rnăk ach o ta ntŭk.

Tĭng wa Ya Tuân, groi kruanh Ủy ban MTTQ Việt Nam nkuăl Đơn Dương, bâh nău kơl aơ, ăp rnăk jêr jŏt lĕ đăp mpăn ntŭk gŭ, đăp mpăn ntuh kơl pah kan jan sa n’hanh âk rnăk lĕ hun hao bah ach o.

“Tâm ba năp nơh, Ủy ban MTTQ Việt Nam nkuăl n’hanh rnâng kan rgŏ jă prăk kơl an nuĭh ach o way geh uănh khlăy mbơh tơih mât kơl an nuĭh ach o n’hanh nău kan mât đăp mpăn nău rêh jêng đah ăp rnăk ach o n’hanh dăch ach o. Ngăn lah, đah ăp nău kơl an rnăk ach o kơt jut jăng ngih truh sat, kơl tơm ntil, ndơ dŏng tuch tăm kơl an nău pah kan jan sa n’hanh kơl an kon hoc rlet rlău nău jêr...lah ăp nkô̆ nău dôl geh uănh khlăy tâm nău ƀư tĭng tâm nkual rnoi đê̆”.

Wa Điểu Chônh, 74 năm deh, ƀon Serê 1, xă Đăk Ru, nkuăl Dak Rlâp nkoch, uănh saơ neh dak rgâl mhe jêh rklaih đăp mpăn năm 1975, rơh druh ndăm nar aơ lơ ngăch prăl, geh nău wât, wa dŭt rhơn. Aƀaơ ăp jay geh piăng sa, ao nsoh, trong hăn dơh uĕh, kop ji dơi săm ngăch, oh kon dơi tât ngih sam ƀŭt... wa Điểu Chônh nkoch:

“Bah năp rklaih đăp mpăn hăn trơn du ăp ntŭk, jêh rklaih đăp mpăn mpôl hên sĭt ƀon tơm, rnôk nĕ nău rêh jêr jŏt ngăn, trong hăn, điện mô geh. Tât năm 1993 mư geh trong hăn tât ta aơ, jêh nĕ kônh wa mư ntơm đăp mpăn hun hao wăng sa rêh jêng, rgum ƀư sa mir ba, tât aƀaơ nău rêh rêh đăp mpăn lơn, geh tŏng sa, tŏng nsoh, rnăk wâl âk rnăk hun hao ngăn. Aƀaơ geh trong hăn dơh, âk nuĭh hăn tâm mir ngai dơh đŏng, kop ji săm ji dăch đŏng, nuĭh ji mbăn hăn ngih dak si nkuăl, n’gor. Lah nsum aƀaơ ngih wâl, nău rêh dŭt uĕh âk ngăn hôm. Kon sau hăn nti geh trong hăn, mô hôm jêr jŏt kơt bah năp đaơ. Mpŏng ƀon lan nar lơ hun hao”.