VOV4.M’nông:   Nkual tây Nguyên dôl dâk bah năp ŭch rgâl mhe, đah 4/5 n’gor mbra geh ăp trong cao tốc tâm năm tât. Aƀaơ, n’gâng kan ăp ntŭk dôl dŭt n’hâm tâm rgop đah ăp n’gâng kan, nău kan geh tât gay ntrôl ngăch ăp nău nchrăp ƀư. Doanh nghiệp n’hanh nuĭh ƀon lan tâm nkual dôl âk nău ŭch mpŏng đah nău hun hao rgâl mhe tă bah âk trong cao tốc aơ.

Bah nău nău đă khlay bah Nău nchrăp ƀư trong ndeh cao tốc Khánh Hòa-Buôn Ma Thuột đah tâm rnôk hun hao wăng sa-rêh jêng, khay 7 mhe rlău, Rnâng kan Hội đồng Nhân dân n’gor Khánh Hòa lĕ rgum Rƀŭn nkô̆ way bôk nău, n’hanh mbơh an Nghị quyết mpeh tâm ton pă tơm prăk ntuh kơl nsum lvang 2021-2025, bah tơm prăk n’gor nchrăp bơi 350 rmen prăk gay ƀư tĭng nău nchrăp kan. Wa Trần Mạnh Dũng, Groi Kruanh Hội đồng Nhân dân n’gor Khánh Hòa an gĭt:

        “Aơ lah ndơ ƀư khlay, ntrôl an nău hun hao wăng sa-rêh jêng bah 2 n’gor Dak Lak n’hanh Khánh Hòa. Lơn lah wơt bôk năp nău hun hao bah nkual wăng sa Vân Phong, ndrâm dak Vân Phong an tăch n’gluh dŭt âk ndoh ndơ lŏ mir bah Dak Lak. Chính phủ n’hanh Quốc hội lĕ uănh mĭn, nău ƀư bah n’gor tŏng ăp prăk bah Trung ương. Nău kan bah Hội đồng nhân dân ndrel đah UBND an mĭn ƀư”.

Thủ tướng Phạm Minh Chính uănh trong cao tốc Khánh Hòa-Buôn Ma Thuột.

Nău nchrăp ƀư ndâk njêng trong ndeh cao tốc Khánh Hòa-Buôn Ma Thuột lah ngoăy tâm âk nău nchrăp ƀư khlay bah ngih dak dơi Chính phủ đă Quốc hội ntrŭnh an ntuh kơl tĭng trong ƀư ntuh kơl nsum. Dĭng lĕ rnoh jong trong nklăp 117 km đah têh 4 mbôr ndeh n’hanh nchrăp ntơm ƀư năm 2023, ntơm jêh năm 2025. Nău nchrăp ƀư rlău n’gor Khánh Hoa mbra rgop kơl n’gor ơm rdâk nsơm tay, hun hao wăng sa-rêh jêng, ntrŭt an tâm rgop, ntrôl kan ndrel đah Khánh Hòa n’hanh ăp n’gor nkual Tây Nguyên.

Mpeh bah dâng Tây Nguyên, n’gor Lâm Đồng lĕ nchrăp tŏng ăp ndơ, nchrăp rdâk ƀư trong cao tốc Tân Phú-Bảo Lộc n’hanh Bảo Lộc-Liên Khương rnôk jêh Thủ tướng uănh an ntrŭnh ntuh kơl. Trong cao tốc Dầu Giây-Liên Khương geh dĭng lĕ jong nklăp 200km, dơi pă ƀư 3 nău nchrăp geh: Dầu Giây-Tân Phú, Tân Phú-Bảo Lộc n’hanh Bảo Lộc-Liên Khương. Wa Trần Văn Hiệp, Kruanh UBND n’gor Lâm Đồng an gĭt, n’gor mbra pă 15.300 rmen prăk an 2 nău nchrăp ƀư trong cao tốc ta n’gor, lah lvang Tân Phú-Bảo Lộc n’hanh Bảo Lộc-Liên Khương.

“Trong Cao tốc an dŏng lah ơm ri ta dŭt năm 2025, lah mbrơi geh tâm khay 6/2026. Gâp mĭn lah pơng mbra uănh tay tâm rgŏ năp hun hao bah n’gor Lâm Đồng, rgâl lĕ rngôch muh măt bah n’gor Lâm Đồng. Bah aơ hăn TP.HCM roh 8-9 mông, nar lễ ri 10-12 mông mbra rhoăt hôm 3-3,5 mông, mbrơi ngăn lah 4 mông. Nău rdêng biăp-nkao, ndơ lŏ mir hăn TP.HCM dŭt dơh, jêh nĕ rdêng ndoh ndơ, măy mŏk... ngăch dơh tay”.

Yôk An Khê, ntŭk jêr ta Quốc lộ 19 đah n’gor Gia Lai n’hanh n’gor Bình Định

Tâm ban nĕ đŏng, nar 17/8 mhe rlău, UBND n’gor Dak Nông n’hanh UBND n’gor Bình Phước lĕ geh nar pah kan đah Tập đoàn Vingroup n’hanh Ngân hàng Thương mại cổ phần Kỹ thương Việt Nam mpeh nău nchrăp ƀư ntuh kơl ndâk ƀư trong cao tốc Bắc-Nam mpeh Tây lvang Gia Nghĩa-Chơn Thành, đah jong nklăp 130km. Ta nar pah kan, kruanh ăp n’gâng kan, nău kan n’hanh ăp nkuăl ntŭk nchrăp ƀư hăn rlău mĭn lah nău khlay bah trong cao tốc Dak Nông-Chơn Thành. Nău aơ mbra geh ntŭk hun hao an 2 n’gor, tâm di nău ŭch kâp bah Nuĭh ƀon lan 2 n’gor. Ntoh ngơi ta nar pah kan, Kruanh UBND n’gor Dak Nông Hồ Văn Mười mĭn lah hăn ndrel đah Bình Phước tâm rnôk mbơh ƀư nău nchrăp ƀư. Nău ƀư tĭng trong cao tốc aơ gay nta an hun hao wăng sa-rêh jêng bah n’gor Dak Nông lah êng n’hanh Tây Nguyên lah nsum.

Hôm mpeh bah lơ Tây Nguyên, mhe aơ UBND n’gor Gia Lai lĕ geh sam ƀŭt jao an N’gâng kan ntung trong n’gor tâm rgop đah du đêt ntŭk mbơh ƀư mĭn njêng trong ntuh kơl, ƀư sam ƀŭt rhăch nău dăn đă ƀư trong cao tốc Pleiku-Quy Nhơn (n’gor Bình Định). Tĭng sam ƀŭt mbơh năm 2020 bah 3 n’gor Gia Lai, Kon Tum, Bình Định njuăl Chính phủ, nchrăp cao tốc Pleiku-Quy Nhơn, jong 160km. Đah rnoh prăk nchrăp 56.000 rmen. Nar 22/5/2022, ntoh ngơi ta nar pah kan đah Thủ tướng Chính phủ Phạm Minh Chính, wa Hồ Văn Niên-Bí thư N’gor ủy Gia Lai dăn đă Chính phủ pă prăk ntuh kơl lvang 2026-2030 mô lah jao ăp ban, n’gâng kan, nău kan Trung ương kơl n’gor Gia Lai joi nuĭh kan ndrel ơm mbơh ƀư bah năp năm 2030:

 Bản đồ mpeh trong cao tốc Dầu Giây-Tân Phú-Bảo Lộc-Liên Khương.

“Mpôl hên tâm nchră đah ăp đồng chí ta Bình Định, 2 ntŭk dŭt nsrôih mbơh ƀư ndâk nkra trong cao tốc aơ. Lah trong cao tốc ta ntŭk ngih dak, Tây Nguyên mô hŏ geh du mét cao tốc. Aơ lah nău mô tŏng geh an ăp n’gor Tây Nguyên. Mpôl hên mĭn lah, kơt ntung trong, ngăn ntung trong mô dơi uănh mĭn ntuh kơl, ngăn lah trong cao tốc ri đah Gia Lai lah êng, Tây Nguyên lah nsum đah ăp n’gor Duyên hải Miền Trung, Đông Nam bộ, Tây Nam Bộ n’hanh ăp n’gor mpeh bah lơ mbra geh đêt ngăn”.

Đah ăp nău nchrăp ƀư cao tốc lĕ n’hanh dôl dơi ƀư, nkual Tây Nguyên dôl dâk bah năp nău ŭch rgâl mhe. Doanh nghiệp n’hanh nuĭh ƀon lan tâm nkual dôl geh âk nău ŭch mpeh nău hun hao mhe tă bah ăp trong cao tốc aơ.

                    Nuĭh rblang: Y Sưng Phê Ja