Đah ƀon lan ăp rnoi nuĭh, Tết Độc lập mô knŭng lah rnôk nkah tay nău way ơm, nkah gĭt ăp rơh kơn u che, ma hôm lah suan ntrôl gay tâm rnglăp, hun hao ƀon tơm. Ta Di tích lịch sử ngih dak Yôk 722 - Đăk Săk, n'gor Lâm Đồng, ăp nar khay Pham nkah tay nău nkah mpeh ăp rơh tâm lơh dăng bah tahen n'hanh ƀon lan  he ta ntŭk tâm ăp năm 1965 - 1975, lơn lah Tâm lơh Đức Lập khay puh năm 1968. Đah wa Y Dơi, tahen ơm nuĭh Bunong, ta ƀon Đăk Săk, nău nkah tâm lơh tâm su hôm e kơt ơm.  "Gâp hăn tahen bah năm 18 năm deh,. Ăp năm lơh Mỹ, mpôl hên gŭ tâm bri ta Dak Prí, Nâm Nung, geh rnôk hăn tât Campuchia đŏng. Aƀaơ hôm rêh, dơi wơt nar Quốc khánh, uănh ƀon lan rgâl mhe, kon sau geh nău rêh uĕh lơn, gâp rhơn ngăn. Gâp dơi N'gâng kan mât njrăng bri dak ƀư jay aơ, ăp khay dơi ntop kơl 6/7 rkeh prăk, oh nô mô hôm dơi saơ nar đăp mpăn. Gŭ rêh tâm nău đăp mpăn, gâp lơn ma uănh khlay n'hanh nkah gĭt oh nô lĕ khĭt."

 Bah nău rhơn nar Quốc khánh, ƀon lan ăp rnoi nuĭh Tây Nguyên lơn ma saơ kloh ăp nău rgâl mhe tâm nău rêh. Ta xã Ia Tul, n'gor Gia Lai, âk ndơ ƀư ntung trong dôl dơi an ƀư kơt trong me nthoi Quốc lộ 25 đah nklang xã, trong dak kloh uĕh ta ƀon Biah A, trong bê tông xi măng tâm ƀon hăn nkual tuch tăm ƀon Tơ Khế. Ăp trong n'hong dak, trạm bơm điện, ntŭk n'hoch dak ta ƀon Tơ Khế, Bôn Biah A, Bôn Biah B dơi ntuh kơl đŏng, rgop nking n'gang dak băm, kơl an nău kan tuch tăm. Wa Nay Hao, nuĭh geh nsing nơm ta ƀon Jư̆, xã Ia Tul, nkoch mpeh nău khlay bah nar Quốc khánh:  "Nar Quốc khánh 2/9, nar Wa Hồ răk bản Tuyên ngôn Độc lập, n'hanh aơ way lah nar lễ têh khlay bah rnoi nuĭh he. Geh nău đăp mpăn ri mơ geh nău rêh hơm răm, đăp mpăn n'hanh uĕh lăng kơt nar aơ. Gâp saơ neh dak he dôl hao têh dăng, pơk hvi tâm boh đah lam ntŭr neh. Bar pe năm dăch aơ, nơm geh âk trong kơl di, nuih n'hâm tâm rnglăp tâm ƀon lan nar lơn ma krêp dêh. Kônh wa ăp nuĭh du nuih n'hâm tĭng trong bah Đảng, ndrel ƀư sa hun hao wăng sa gay ndâk njêng ƀon tơm ntop hao uĕh lăng."

Ta thôn Kdăng, xã Anh hùng Kdang, n'gor Gia Lai, ntŭk geh 256 rnăk ƀon lan nuĭh Ba Na, nău nđơr wơt Quốc khánh lĕ n'gŭr răm. Ăp n'ha cờ neh dak dơi yông ta năp ăp rnăk. Kônh wa hôm ƀư ăp nău kan thể thao, njêng nău nđơr răm, tâm rnglăp tâm ƀon lan. Wa Xuin, nuĭh ƀon lan ƀon Kdăng, nkoch:  "Nar lễ mùng 2/9, rnăk wâl n'hanh lĕ ƀon kŭnh cờ Tổ quốc, ƀư ngêt sa rhơn nar Quốc khánh. Bah năp nar lễ, ăp rnăk rgop du đêt gay rwăt sŭr n'hanh nchrăp ndrănh yăng gay nsum rhơn nar lễ têh dja, nkre rhơn, nkre đăp mpăn n'hanh tâm rnglăp nsum mpôl. Năm aơ thôn ƀư pâl rlưn nkre ta ƀon lĕ rmôt druh ndăm n'hanh kon se dŭt lah rhơn; njêng nău nđơr, nđơr nti an ăp kon se jêh ăp nar lễ tết".