VOV4.M’nông: N’gor Kon Tum geh trong n’har bri jong rlau 292 km tâm êp ma bar dak băl Lào ndrel Campuchia. Ndrel ma nau kan mât nâp nau ƀư tơm, ndâk ntrong n’har bri đăp mpăn, tâm boh, tâm ăp rnôk têt tât, cán bộ tahen Biên phòng Kon Tum hôm ƀư âk nau kan, kơl an ân ƀon lan, tâm rnglăp ueh lăng tahen-ƀon lan ntŭk tơm bah neh dak.

            Rnăk vâl yuh Y Thêu, rnoi Jeh Triêng, tâm ƀon Đăk Ga, xã n’har bri Đăk Plô, nkuăl Đăk Glei, n’gor Kon Tum lah ngoai tâm 12 rnăk geh nau rêh jêr jŏt. Yor âk nkô̆ ma nau rêh bah 5 nŭih tâm rnăk vâl mro tâm rnôk mô tŏng sa, pah pât mro. Bơi tât tết, nau ŭch ngăn bah rnăk vâl lah geh tŏng phe sa, mô janh mĭn tât ôh bánh chưng ndrel bánh kẹo ri lơn ma mô janh. Nau rhơn tât ma rnăk vâl yuh Y Thêu rnôk cán bộ, tahen biên phòng Đồn Đăk Blô tât ngih ôp khâl, pă nklâm ndơ ân rnăk păng geh tŏng sa tết. Ndrel ma nê cán bộ biên phòng hôm jă rnăk păng râng Nar rgum nklâm bánh chưng ndrel geh pă ân leo nsĭt sa tết đŏng. Yuh Y Thêu, ngơi:

            ‘Rnăk hên jêr jŏt ngăn kâp tât tết năm mhe yơn lah mô geh ndơ gay ma sa tết, Gâp lah ueh ngăn hŏ geh bu pă nklâm ndơ tât ma ty hên. Năm mhe jêh gâp kŏ rhơn ngăn rnôk geh bánh kẹo gay ma ndrel ma rnăk vâl sa tết, rnăk vâl vâl hên nsum rhơn m’ak đŏng”.

            Mô ân geh rnăk ƀon kan mô geh tết lah nau nsôih bah cán bộ tahen 2 dồn biên phòng Đăk Blô ndrel Sông Thanh dôl gŭ kan tâm xã Đăk Plô, nkuăl Đăk Glei. Ndrel nau nchrăp mât chăm tết ân ƀon lan bah Đảng uỷ, UBND xã Đăk Plô, 2 đồn Biên phòng kŏ ndâk nau nchrăp tâm rgop nsum ma Đnảg uỷ, n’gâng kan bah nkuăl ƀư âk nau kan vơt tết, vơt năm mhe ân ƀon lan bah xã n’har bri, ntoh ngăn lah Bôk nau kan “Năm mhe biên phòng duh răm nuih n’hâm ƀon lan” ndrel “Nar hội bánh chưng ndrih”. Wa Y Thanh, Kruanh UBND nkuăl Đăk Glei, mbơh, nkuăl 3 xã n’har bri tâm êp ma dak băl Lào, geh: Đăk Plô, Đăk Nhoong ndrel Đăk Long. Rnơm ăp nau kan yor rmôt tahen biên phòng ƀư, ƀon lan tâm nkuăl n’har bri geh tay âk nau rhơn vơt tết nămmhe:

            ‘Ăp tahen biên phòng tâm ăp dồn ndrel ma ăp kônh wa tâm nkuăl n’har bri tâm rnôk aơ geh rhơn vơt năm mhe vơt tết. Kônh wa geh ndơn âk nklâm ndơ bah ăp tahen ndrel ăp rmôt hăn kan bah N’gâng kan rđau kan, jêh ri bah N’gâng kan rđau tahen biên phòng ri kônh wa rhơn ngăn. Ntơm bah nê njêng nau tâm boh ueh lăng đah tahen biên phòng ndrel ƀon lan nkuăl n’har bri. Kônh wa geh tết rhơn m’ak, duh răm, ueh lăng”.

            Gay nau rhơn vơt tết tât ma ăp nŭih ƀon lan nkuăl n’har bri, tết năm mhe Nhâm Dần năm aơ, N’gâng kan rđau tahen n’gor Kon Tum hôm sŏk prăk pă ân 300kg phe m’êt ân ăp rmôt tahen njok trong n’har đah 2 dak băl Lào ndrel Campuchia gay ƀư Nar hội bánh chưng ndrih. Cán bộ, tahen ăp Đồn kŏ sŏk prăk khay bah nơm gay ma rvăt ndơ sa tât ôp khâl, kơl an ân ăp rnăk mâp nau jêr gay ma ăp rnăk geh sa tết. Êng nê, Bôk nau kan “Năm mhe nkuăl n’har bri duh răm nuih n’hâm ƀon lan” geh ƀư tâm ăp 13 xã n’har bri bah 4 nkuăl Đăk Glei, Ngọc Hồi, Sa Thầy ndrel Ia H’Drai đah ăp nau kan ngăn hŏ ntop nau rhơn, ueh nâp tay nau tâm boh tahen ndrel ƀon lan taânkưl n’har bri. Đại tá Lê Minh Chính, Chính uỷ tahen Biên phòng n’gor Kon Tum mbơh:

            ‘Tâm bôk nau kan aơ ri ntŭk kan hên ƀư âk nau kan, nkre nau hăn khâl, pă nklâm ndơ ân ăp rnăk dơi kơl, rnăk ach o nkre ƀư nau kan kơl an nau rêh jêng ndrel drăp ndơ ân rnăk vâl geh nau jêr. Nkre ƀư nau kan njroh mprơ, ăp nau pâl ueh gay ma ân ăp kônh wa geh du nau rhơn vơt tết ân ueh m’ak, đah nuih n’hâm ŭch ăp nŭih kŏ geh sa tết ueh lăng mô ân nŭih geh nchlơi êng ba kơi”.

            Ndrel ma nau rhơn vơt tết năm mhe Nhâm Dần 2022, tâm njok trong n’har ri jong rlau 292 km tâm êp ma dak Lào ndrel Campuchia, nŭih ƀon lan tâm 99 thôn, ƀon, tâm 13 xã bah 4 nkuăl tâm n’gor Kon Tum geh âk nau rhơn gay ma lăp tâm năm mhe. Tât rnôk aơ hŏ geh 4/12 xã n’har bri bah n’gor Kon Tum geh tŏng dơi ƀon lan mhe. Nau rêh bah rlau 16.200 rnăk đah 25 rnăk rnoi oh nô ndrel rêh nar lơn geh rgâl, rnoh rnăk cah o n’huch âk. Tết năm mhe ơm bah rnoi mpôl lah rnôk gay cán bộ, tahen biên phòng Kon Tum ndrel n’gâng kan, nŭih ƀon kan ƀư rjăp lơn nau tâm rnglăp nsum n’hâm, nsum nuih n’hâm mât nâp nkuăl neh, đăp mpăn neh dak ndrel hun hao văng sa rêh jêng lơn nâp ân kônh wa rêh tâm njok n’har bah neh dak./.

Nŭih rblang: H’Thi