Âk kỹ sư, công nhân pah kan tâm ntŭk nkra trong cao tốc Khánh Hoà, Buôn Ma Thuột mra pah kan rlau mông tết gay ma đăp mpăn nau ngăch bah nau kan. Ăp nar êp tết, tâm ntŭk nkra trong cao tốc Khánh Hoà, Buôn Ma Thuột trong rlet xã Ea Knuêc, nkuăl Krông Pắk hôm nkra trong. Nau kan nkra trong cao tốc Khánh Hoà-Buôn Ma Thuột jong nklăp 117,5km nthoi n’gor Khánh Hoà ma Dak Lak. Nau kan geh pă jêng 3 nau ƀư, geh: rnoh ƀư kan mrô 1 yor n’gor Khánh Hoà ƀư tơm ntuh kơl.

Nau kan aơ geh n’gor Dak Lak jao ân Rnâng kan mât bôk nau kan ntuh kơl ndâk trong hăn ndrel tuch tăm hun hao ƀon lan n’gor ƀư tơm ntuh kơl ntrŭnh ndâk nkra. Tâm rnôk tết năm mhe Giáp Thìn 2024, ăp rmôt kan tâm nau kan mrô 3 kŏ đăng ký pah kan tâm ăp nar tết. Rnâng kan hŏ đă ăp tơm kan êng nau mât đăp mpăn nau ngăch, nau nâp ueh nau kan, ri ân uănh chăm ân ueh tât nau nkhôm ân nŭih pah kan râng nkra trong tĭng nau ntrŭnh./.