VOV4.M'nông: Ntơm bah nar 4 tât 13/5, kon se nti jrô 12 lam dak đăng ký râng thi tốt nghiệp THPT năm 2022 ta trong pơk mât uănh thi bah Bộ Giáo dục n'hanh Đào tạo. Nău mhe lah rgâl bah hôm ma đăng ký ta hồ sơ si ƀŭt ri năm aơ lor bôk năp, kon se đăng ký râng thi pơk sŏng dăng, êng nuĭh râng thi êng bah dih hôm dơi đăng ký na nê̆ ma si ƀŭt ta đơn vị tă bah Sở Giáo dục n'hanh Đào tạo quy định đŏng. Bol ma năm lor bôk năp đăng ký râng thi pơk sŏng dăng, yơn nău đăng ký bah ăp nuĭh râng thi ƀư dơh soih, hŭch bah tih n'hanh rhuăt glêh mông nar rđĭl đah đăng ký ma lha si ƀŭt kơt ăp năm.

Ăp kon se nti jrô  12 đăng ký thi pơk sŏng dăng ta ntŭk mât uănh thi ntơm bah nar 4/5 tât nar 13/5 ta nhih nti phổ thông. Gay ăp nuĭh râng thi ƀư bên, Bộ  Giáo dục n'hanh Đào tạo pơk trong gay ăp nuĭh đăng ký râng thi rlong. Tài khoản lah mbrô căn cước công dân mô lah chứng minh nhân dân bah kon se nti. Nkhêp nuĭh i mô geh căn cước công dân mô lah chứng minh nhân dân ri dŏng mã số định danh dơi nhih pah kan công an pă an gay ma rgâl.

Lôch rnôk Bộ Giáo dục n'hanh Đào tạo pơk trong mât uănh thi, oh Nguyễn Xuân Mạnh, kon se nti jrô 12, Nhih nti THPT Phúc Lợi, Hà Nội hŏ pơk lăp tâm trang web gay đăng ký râng thi tốt nghiệp trung học phổ thông năm 2022. Hŏ geh 1 pơh lor bah năp nê nơh gay rlong đăng ký, jêng Mạnh dơn roh bar pe mnĭt gay ƀư lôch jêh si ƀŭt đăng ký bah he dơm đah 16 nkô̆ tơm, ngăch lơn rđĭl đah nchih ma si ƀŭt:

“Rnôk nar đăng ký rlong thi ri gâp rlong đăng ký n'hanh geh nai ntĭm nti đŏng n'hanh nar đăng ký thi ngăn ri gâp saơ mô geh mâp âk nău jêr jŏt đêt".

        Rlău ma nău dơh ngăch lơn rđĭl đah nchih ma si ƀŭt, đăng ký thi tốt nghiệp trung học phổ thông pơk sŏng dăng bah ngai hôm kơl ăp nuĭh râng thi mât uănh dơi tâm ban kơt nkra dơi nău lư bah he ngăch lơn, di lơn tâm rnôk đăng ký. Du hê kon se nti êng ƀa ƀă ta Hà Nội an gĭt:

“Nău ƀư online kơt aƀaơ ri nău ôp uănh tay ăp tŏng nău lư dơh lơn đŏng rnôk ma geh ntŭk nchih ma hên mô gĭt ri păng ơm mpơl luh ta nê, mpôl hên djăt ma nchih n'glăp tâm trôm nê du trong dơh ntơ dơm".

        Tâm ăp nar bôk năp đăng ký râng thi tốt nghiệp trung học phổ thông, rnoh âk kon se nti đăng ký mô hŏ âk, yơn ăp nhih nti hôm tâm pă nai ntĭm mât uănh ƀư nchih si ƀŭt an kon se nti đŏng. Ăp nai ntĭm mât jrô ntĭm nti mbơh gĭt an ăp kon se ƀư si ƀŭt n'hanh ăp ntŭk rgâl nchih ma nuĭh râng thi ân njrăng uănh. Gay nta trong dơh an nuĭh thi, ăp nhih nti nchrăp jrô máy tính geh nthoi mạng internet n'hanh đă nai ntĭm công nghệ thông tin nchrăp ntop kơl ăp kon se. wa Huỳnh Thị Hòa Bình, Hiệu trưởng Nhih nti THPT Lạng Giang mbrô 1, n'gor Bắc Giang an gĭt:

       “Đah nău kon se nti đăng ký pơk sŏng dăng ri ăp kon se dŏng ta điện thoại kon se nơm, mô lah ta máy tính ăp kon se nơm ta jay dĭl, nău dja păng dŭt dơh an kon se nti. Yơn lah, tâm rnôk an ƀư đah kon se nti ri nhih nti saơ ăp kon se way geh ăp  nkô̆ nău, ntĭt kơt ăp băl nê ndrih ma pơk lăp tâm tài khoản, rgâl mật khẩu, yơn lôch nê ri ăp băl  nê chuêl tay mật khẩu bah he nơm. Nhih nti tâm pă cán bộ ntop kơl, hôm rmôt cán bộ nai ntĭm chủ nhiệm jrô 12 way nchrăp gay ntop kơl ăp kon se.

        Bah meng ăp nău dơh uĕh, ri rnôk đăng ký râng thi tốt nghiệp trung học phổ thông pơk sŏng dăng bah ngai geh du đêt nău khoah đŏng, kơt trong ƀoh internet mô đăp mpăn ƀư du đêt nuĭh râng thi geh n'gluh bah dih trang web tâm rnôk nchih n'glăp si ƀŭt. Bah meng nê, nău nchih mã số phường, xã mhâm ƀư, môn an kơl lor mhâm ƀư kon se nti hôm wĭ wĕ đŏng, ân đă nai ntĭm nti kơl ƀư. Nai ntĭm Bùi Thị Hồng Duyên, Nhih nti rep gưl Việt- Úc, Hà Nội nkoch: 

       “Mbra geh mâp âk jêr jŏt mpeh trong ƀoh. Tâl bar đŏng lah tâm rnôk đăng ký pơk sŏng dăng bah ngai ri du đêt kon se hôm mâp âk jêr jŏt jêng lah nău đăng ký phường, xã mô geh ta trong đăng ký luh mpơl êng jêr jŏt. Tâl pe lah du đêt kon se hôm jêr jŏt mpeh nău ăp kon se gĭt kâp thi môn ngoại ngữ đŏng lah mô".

          Wa Phạm Quốc Khánh, Groi Cục trưởng Cục Mât uănh săk blău ntĭm nti (Bộ Giáo dục n'hanh Đào tạo) an gĭt, aơ lah lor bôk năp an kon se nti jrô 12 đăng ký râng thi pơk sŏng dăng bah ngai, jêng Bộ hŏ rlong ƀư đăng ký pơk sŏng dăng bah ngai ta 2 nhih nti THPT nkual jêr jŏt bah n'gor Bắc Giang n'hanh Hòa Bình n'hanh kêng dŭt ăp nuĭh râng thi đăng ký pơk sŏng dăng bah ngai dŭt dơh ngăch:

      Ta 2 nhih nti trung học phổ thông ta ntŭk jêr jŏt bah lĕ bar n'gor dja, lôch jêh bôk năp ăp kon se dŭt rhơn n'hanh dŭt dơh ƀư  da dê. Na nê̆ uănh saơ tĭng ăp kon se nti ƀư ri mbra an saơ lah ăp kon se dŭt rhơn nđơr n'hanh pet lât dŭt dơh ngăch, 3 mnĭt hŏ ƀư lôch jêh, nkô̆ lah phần mềm dŭt ăp tŏng nău lư n'hanh tâm nê hŏ ndơn mban dơi ngoăy tâm ăp nău rgop dŭt khlay bah nai ntĭm nti tâm pah kan rđău đă nê lah ôp uănh n'hanh lôch jêh ăp tŏng si ƀŭt rgum nchih nău lư bah n'gâng kan ntĭm nti ta bar nhih nti ta nkual dŭt jêr jŏt mha êng bah 2 ntŭk nê ri 100% ăp kon se nti hŏ geh mã định danh.)

        Đah ăp kon se râng thi dah rŏng êng bah dih, lôch rnôk nôp phiếu đăng ký râng thi tốt nghiệp THPT na nê̆ ta ăp ntŭk tă bah Sở Giáo dục n'hanh Đào tạo quy định, nuĭh râng thi mbra dơi đơn vị đăng ký râng thi pă an tài khoản (lah mbrô căn cước công dân mô lah chứng minh nhân dân bah nuĭh râng thi nơm) n'hanh mật khẩu gay pơk lăp tâm ntŭk mât uănh thi.

        Bộ Giáo dục n'hanh Đào tạo njrăng đă, kon se râng thi ân mât prăp êng tài khoản n'hanh mật khẩu mô an mpơl gĭt. Nkhêp geh chuêl tài khoản n'hanh mật khẩu, kon se nti mbra tâm ôp đah nhih nti- ntŭk đăng ký râng thi dơi pă an tay./.

Nuĭh rblang: Điểu Thân