Năm aơ, n’gor Dak Lak geh rlau 20 rbăn kon se đăng kí râng thi tâm 32 ntŭk thi tâm 15 nkuăl, nkuăl têh, nkuăl ƀon têh tâm n’gor. Gay rơh thi tốt nghiệp THPT năm 2023 geh nau dơi ueh ngăn, n’gâng kan ntĭm nti n’gor Dak Lak dôl nsôih nchrăp ăp nau kan geh tât rơh thi. Tâm nê nkô̆ nau nti ân rjăp, uănh rjăp nau blau bah kon se gay ma pă nau ntĭm nti dôl geh njrăng. Wa Phạm Đăng Khoa, Giám đốc N’gâng kan ntĭm nti Dak Lak mbơh: Tât rnôk aơ, nau nchrăp ân rơh thi tốt nghiệp THPT năm 2023 dôl geh ƀư tâm di nau nchrăp. Êp nau kan kơp, mêt uănh nau kan ân rơh ntĭm nti bah N’gâng kan ntĭm nti, ntĭm nti ân cán bộ uănh thi. Ăp ngih săm ƀŭt geh rơh thi tốt nghiệp dôl nsôih ƀư nâp tay nau nti bah nơm, ƀư nau nchră uănh năl ân ăp kon se nti tĭng đề thi tă geh N’gâng kan ntĭm nti mbơh luh gay ma pă săch ăp kon se ntĭm nti ân tâm di:

            ‘Rƀŏng tâm ăp nŭih lah kon se mô nâp mpeh nau kan ntĭm nti gay ma kơl an ăp kon se ndrel ăp ngih săm ƀŭt kŏ mbơh pă ân nai nti kon se ntĭm nti tay tâm nau kan kan bah nơm ân ăp kon se aơ gay ăp oh geh tay nau gĭt ndrel geh nau rnơm tâm rơh thi aơ”.

            Tĭng nau ntrŭnh bah N’gâng kan ntĭm nti, ntơm lơ 4/5, kon se tâm lam dak ntơm đăng ký râng thi Tốt nghiệp THPT năm 2023. Rnôk đăng ký ntrơm 5h kêng măng lơ 13/5. Kon se dôl nti jrâu 12 tâm ăp ngih săm ƀŭt THPT, ntŭk ntĭm nti nau kan, ntĭm nti ƀa ƀơ đăng ký râng thi tĭng nau trực tuyến, kon se dah rŏng ri đăng kí tât tâm ngih săm ƀŭt.

            Lơn ma êp tât nar thi tốt nghiệp THPT năm 2023, oh Phạm Chính Tuyến, kon se nti jrâu 12, ngih săm ƀŭt THPT Lương Thế Vinh, Hà Nội lơn ma saơ jâk jêr lơn, yor aơ lah rơh thi khlay ngăn tâm mpôl ngăch nau nti nau kan jêh aơ:

            ‘Kŏ bơi tât thi hôm ri hôm geh âk trong gay ma lăp đại học. Hên kŏ geh âk nau săch, geh nau jêr đŏng. Tâm pơh ri hên săch 4 nar gay ma ntĭm nti ntop tay ân tât măng, hôm ăp nar mô geh nau ntop tay ri mra ƀư du đề toán, du đề Tiếng Anh jêh ri nkra êng. Hôm Văn lah geh nar ƀư ti hên săch răk đŏng gay ma gĭt kloh lơn mpeh bài nti”.

            Nau jâk jêr, rvê nsŭn n’hâm nchrăp ân rơh thi tốt nghiệp lah nau mĭn nsum bah âk ngăn kon se tâm rnôk knŭng hôm rlau du khay đŏng lah mra geh rơh thi. Aơ lah rnôk dăch dŭt ngăn gay ăp kon se geh rgum nti âk rjăp ăp môn tâm rnôk thi tốt nghiệp. Mpeh ăp ngih săm ƀŭt nau săch nti ân kon se ân nâp lơn, ndrel ma ƀư nâp tay nkô̆ nau nti, nau nkah gĭt tơm ân kon se ân nâp tam lơn, ndrel ma nau ƀư nâp nau ntĭm nti ân kon se, ri nai ntĭm nti ăp môn hôm ân kon se ƀư ăp ntil bài tập, đề thi mẫu. Nai Vũ Thị Minh Trang, nai nti môn Ngữ văn, Ngih săm ƀŭt liên cấp Alfred Nobel mbơh:

            ‘Êp ăp mông nti tâm jrâu ri ăp oh kŏ geh ăp mông nti gay ma ntop tay ndrel kŏ gơih ngăn ntĭm nti rjăp ăp đề ma ăp nai jao pă ndrel tâm rgop nsum ma ăp nai ntĭm nti tâm ăp nar nti tâm jrâu ntĭm nti đŏng”.

            Bol ma tâm rnôn ôn thi dăch, ndal, yơn ăp nai ntĭm nti kŏ nkah đă kon se ân geh ueh mpeh nau mĭn, n’hâm soan, nchrăp nkah ntĭm nti tay ăp nau gay ma geh nau gĭt tât môn thi. Tiến sĩ Huỳnh Văn Chương, Kruanh n’gâng kan uănh năl nau nâp, N’gâng kan ntĭm nti mbơh đă:

            ‘Rnôk aơ ăp oh kon se dôl rgum tâm nau ntĭm nti ri mpeh N’gâng kan ndrel ngăn lah N’gâng kan mât nau nâp blau tri hên nkah đă ăp kon se geh nau nsôih ndrel ntĭm nti ân rjăp tĭng nau kan, nau nti, mat tâm dăch ăp nau ntĭm nti bah âk ngăn, ngăn lah hên mbơh bah năm 2023. Ăp kon se nsôih mĭn âk ntil nau nti, ngăn lah ăp nau ƀư tĭng kơt, tĭng đă prêh gay nơm geh âk điểm prêh ngăn, gay nkre xét tốt nghiệp yơn ân geh tâm di ngăn tâm nê lah săch lăp đại học ndrel ăp nau êng êng”.

            N’gâng kan ntĭ nti mbơh mra ƀư rjăp tay ăp ntrong phần mềm, ntŭk nti nkoch mbơh nau tâm nau đăng ký râng thi. N’gâng kan ntĭm nti kŏ geh nŭih ƀư nau kan mât njrăng tâm 24/24 mông gay ma kơl rklaih ăp nau tât lah geh. Rơh thi tốt nghiệp THPT năm 2023 mra geh ntơm lơ 27-30/6. Nau geh bah rơh thi mra geh mbơh tâm lơ 18/7./.