Nar 26/7, Thủ tướng Phạm Minh Chính hŏ ƀư tơm rơh hop way nkô̆ rdâk njêng pháp luật khay 7/2023. Ntơm bah bôk năm tât aƀaơ, Chính phủ hŏ ƀư 5 rơh hop way nkô̆ mpeh rdâk njêng pháp luật; mĭn uănh, an nău rgop, n’glêh an đah dŭt âk nău kan geh tât way đă tĭng ƀư; an saơ nău nsrôih âk, dâk kan lĕ n’hâm suan, geh nău tam, bah Chính  phủ tâm trong an ƀư nău kan đăt ndal mpeh nău way đă tĭng ƀư.

Rơh hop way nkô̆ khay 7, Chính phủ mĭn uănh, an nău rgop tâm 3 nău dăn đă rdâk njêng pháp luật, 2 trong nchrăp luật, 2 nău mbơh n’hanh 1 trong nchrăp nghị quyết bah Quốc hội. Tâm nê, geh: Dăn đă rdâk njêng Luật Njrăng, n’gang tăch rvăt nuĭh (rgâl nkra); Dăn đă rdâk njêng Luật Thuế tăch rvăt ndơ mha êng (rgâl nkra); Dăn đă rdâk njêng Luật thuế rnoh khlay ntop n’hao tay (rgâl nkra); Trong nchrăp Luật rgâl nkra, kơi ntop du đêt nkô̆ bah Luật tâm rlong khlay tăch drăp ndơ; Trong nchrăp Luật Bảo hiểm xã hội (rgâl nkra); Mbơh, dăn đă nău dŏng sŏk soăy dŭt đêt lam ntŭr neh; mbơh, dăn đă mpeh nău way, trong ntop kơl nuĭh ntuh kơl rlău ma sŏk soăy./.