Ăp khay ba năp, ta du đê̆ ntŭk ta nkual Nam Bộ n’hanh Tây Nguyên lĕ geh mih têh, rluh neh, dak buk âk ntŭk, ƀư khuch âk tât trong hăn n’hanh nău rêh bâh ƀon lan, ngăn lah ta trong quốc lộ 20 ntuđk hăn let yôk Bảo Lộc n’gor Lâm Đồng, lĕ geh rơh rluh neh ƀư geh 3  nuĭh tahen cảnh sát giao thông n’hanh 1 nuĭh ƀon lan brôi roh. Thủ tướng Chính phủ njoăl nău ôp khâl tât ăp rnăk geh nău rngot klâng roh jot. Thủ tướng chính phủ đă rnâng kan ntĭm leo ngih dak mpeh njrăng, rdâng nău tât bâh mih sial n’hanh Ủy ban ngih dak tâm rdâng đah nău tât, mih sial n’hanh joi nuĭh rmanh, ăp kruanh n’gâng kan, kruanh Ủy ban nhân dân ăp n’gor leo kan ntĭm đă, mbơh tơih răng dăng, ngăch ndăn, geh săk rnglăy nău kan njrăng, rdâng, ndâk nsơm nău tât bâh mih sial, mât đăp mpăn săk soan n’hanh drăp ndơ bâh ƀon lan.

Tât bơi 11h măng 30/7, rmôt kan dơi kan n’gor Lâm Đồng lĕ joi saơ săk bah nuĭh khĭt hôm ƀa ƀă tâm nău pĭch rlâm neh ta yôk Bảo Lộc. Kơt nĕ, săk bah 4 nuĭh geh bŭl tâm neh pĭch rlâm ta yôk Bảo Lộc lĕ dơi rmôt kan dơi kan n’gor Lâm Đồng joi saơ. Yor mih têh jŏ jong ƀư âk ntŭk pĭch rlâm ta yôk Bảo Lộc n’hanh njok trong QL 20. Tâm rnôk 14h30, tâm rnôk dôl ƀư nău kan uănh nđôi, pă trong hăn n’hanh râng mkra ăp ntŭk pĭch rlâm gay đăp mpăn trong hăn nsong, tât ndal geh pĭch rlâm neh hô ƀư 3 tahen CSGT n’hanh du hê nuĭh ƀon lan geh bŭl. Jêh rnôk geh n ău, kraunh n’gor Lâm Đồng lĕ geh măt ta ntŭk ntĭm rđău ăp ntŭk kan rgŏ jă rlău 300 nuĭh ndrel âk ndeh ƀư trong kan wơt kơl n’hanh njoi nuĭh rmanh.

Ta nkuăl Ea Sup, nkuăl Lăk bâh n’gor Dak Lak, ăp nar ba năp lĕ geh mih têh jŏ nar  ƀư dak băm âk rnoh neh ba lŏ, tuh mbo bâh nuĭh ƀon lan n’hanh âk trong hăn lĕ ngeh tâm nglah êng. Na nê̆ ta nkuăl Lăk, mih dak buk lĕ ƀư ngâm rlău 750 ha ba lŏ bâh ăp rnăk ƀon lan ta ăp xã Buôn TRía, Buôn Triết, Đăk  Liêng n’hanh du đê̆ xã, nkuăl têh. Tâm nĕ xã Buôn Triết khuch dŭt âk đah rlău 320 ha, xã Đăk Liêng lah 268ha, xã Buôn Tría lah 106ha, hôm e lah ăp xã Yang Tao, Bông Krang n’hanh nkuăl têh Liên Sơn.

Hôm ta nkuăl n’har bri Ea Sup, mih têh jŏ nar ăp nar ba năp lĕ ƀư âk trong hăn let thôn, xã ta ăp xã Ea Lê, Ea Rôk, Ea Bung...geh dak băm âk ntŭk, âk rnoh neh tăm ba, bum tuh dak băm. N’gâng kan n’hanh ăp ntŭk kan têh ăp ntŭk ta Dak Lak lĕ leo kan mbơh tơih ăp trong kan tâm rdâng đah mih sial.