Ôi 21/4, ta Nhih pah kan kruanh dak, Thủ tướng Chính phủ Phạm Minh Chính ƀư tơm Lễ wơt Thủ tướng Cộng hòa Séc Petr Fiala n’hanh mpôl ntơh măt gưl têh dak Cộng hòa Séc khâl ngăn Việt Nam ntơm bah 20 tât 22/4. Lễ wơt dơi ƀư rgum tĭng nău way an nuĭh mât bôk kan Chính phủ khâl ngăn Việt Nam.

Thủ tướng Phạm Minh Chính jă Thủ tướng Petr Fiala n’grĭng rmôt rhơn n’hao tahen ƀon lan Việt Nam, lôch nê bar Thủ tướng tâm mbơh săk ăp nuĭh hăn ndrel mpôl ntơh măt gưl têh bar dak ta Lễ wơt. Hăn khâl ngăn Việt Nam lah hăn khâl jong nar châu Á lor bôk năp bah Thủ tướng Petr Fiala kơp ntơm bah rnôk dơn nău kan năm 2021 n’hanh lah hăn khâl lor bôk năp bah nuĭh mât bôk kan Chính phủ Séc tât Việt Nam tâm 15 năm aơ. Tâm trong hăn khâl Việt Nam rơh dja, lôch tâm nchră đah Thủ tướng Chính phủ Phạm Minh Chính, Thủ tướng Cộng hòa Séc Petr Fiala ôp srĭng nău Kruanh dak Võ Văn Thưởng; ndrel Thủ tướng Phạm Minh Chính râng rgum nchră doanh nghiệp Việt Nam – Séc n’hanh du đêt nău kan khlay êng ƀa ƀă./.