Ôi 19/4, Thủ tướng Chính phủ Phạm Minh Chính ƀư tơm rơh hop tâl 4 bah Ban rđău đă rgâl dơh glêh siƀŭt nkre đah rgâl mbrô n’hanh mbơh rnoh di nuih n’hâm mpeh rhŏ dŏng ƀư siƀŭt năm 2022, rnoh di nuih n’hâm mpeh rgâl dơh glêh siƀŭt năm 2022 bah Chính phủ. Lah ta rơh hop, Thủ tướng Chính phủ Phạm Minh Chính lah rjăp, rgâl dơh glêh siƀŭt lah ngoăy tâm 03 nău dơn kan đăt ndal, têh dơi jŏ jong, dơi Đảng, Ngih dak dŭt n’hâm ŭanh khlay rđău đă, leo an ƀư.

Thủ tướng dăn đă ăp nuĭh lăp sŏng dăng tâm nkô̆ nău, rgop glêh, di rgum tơm, di nkô̆, đăp mpăn rnoh ngăch, săk tam, rgum ŭanh năl, ƀư kloh ăp nău dơi hŏ geh, ăp nău nchiăng khan, mpăng đêt, nkô̆ jêng, nău tă ơm gĭt leo tĭng ƀư rgâl dơh glêh siƀŭt nkre đah rgâl mbrô rhŏ dŏng an nuĭh ƀon lan, doanh nghiệp n’hanh n’gluh trong nkra bah, mbluh soih ăp trong kol khan, kô̆ yơn tâm trong leo an ƀư. Nkre, ŭanh năl lam lĕ rngôch mpeh nău dơi geh rgâl dơh glêh siƀŭt lah nsum n’hanh n’gluh ăp nău dơn kan, trong nkra na nê̆ gay ntrŭt ntrôl pah kan dja tâm let năp tay.