Tâm mông nar dăch dêh, nsing nơm n’hanh rah rơih, 2 Thủ tướng tâm ban ŭch an lah, nău dăch dêh way ơm Việt-Trung yor Kruanh Hồ Chí Minh, Kruanh Mao Trạch Đông n’hanh ăp rơh kruanh ơm 2 dak ndâk njêng n’hanh mât rgum drăp ndơ nsum têh khlay bah 2 Đảng, 2 dak, an mô rlu ndơn tay, mât njrăng n’hanh ƀư uĕh; lah rjăp nău khlay bah tâm boh ăp ding đah nău hun hao bah ăp dak kơt tâm rnglăp, đăp mpăn, kan ndrel, hun hao bah nkual n’hanh lam ntŭr neh.

Mpeh trong ntrôl kan ndrel năm tât, 2 Thủ tướng tâm ban ŭch n’hao tâm rgâl, tâm rgop, nsrôih ntrôl tâm boh ăp ding hăn tâm lvang hun hao mhe, lơn lah ntrôl ăp nău kan ndrel, ngăn lah kan ndrel wăng sa, tăch rgâl hăn jru, săk rnglăy, nâp nâl; mât trong kan ndrel dăch dêh đah N’gâng kan mât njrăng bri dak, N’gâng kan Công an 2 dak, ndrel ndâk njêng n’har bri 2 dak jêng trong n’har bri tâm rnglăp, đăp mpăn, kan ndrel n’hanh hun hao.