Nar 11/5, Thủ tướng Chính phủ Phạm Minh Chính hŏ mâp Thủ tướng Timor-Leste Taur Matan nkhêp geh râng Tâm nchră gưl têh ASEAN 42 ta Labuan Bajo, Indonesia. Thủ tướng Chính phủ Phạm Minh Chính lah rjăp, kalơ nuih n’hâm tâm rnglăp way ơm n’hanh tâm boh lhăt, Việt Nam mbra tâm pă nău tă ơm gĭt kan, ntop kơl Timor-Leste ơm jêng dak  lăp kan nsum tâl 11 bah rnăk wâl ASEAN.

Bar ding tâm ban ŭch ntrŭt ntrôl tâm rnglăp mpôl hăn khâl gưl têh n’hanh ăp gưl, an ƀư geh nău tam ăp nău tâm ton hŏ ký; nchih nkah âk săk geh tâm boh, lơn lah mpeh tăch rgâl- ntuh kơl, n’hanh tâm ban ŭch nta trong dơh an doanh nghiệp bar dak tăch rgâl, nău  kan geh nău tam ntŭk tăch rgâl nsum. Bar Thủ tướng tâm ban ŭch ntrŭt ntrôl tâm boh văn hóa, pâl nđaih, ntĭm nti, tâm nđŭr ƀon lan gay n’hao dăng buăt nthoi; pơk hvi tât ăp trong kan mhe kơt rgâl mbrô, hun hao nđĭr uĕh, wăng sa wăch jêng tay.