Ôi 2/6, Thủ tướng Chính phủ Phạm Minh Chính tât mbah rhơn ăp chức sắc, tăng ni, Phật tử Giáo hội Phật giáo Việt Nam nkhêp geh Đại lễ Phật đản Phật lịch 2567 - Dương lịch 2023 n’hanh râng lễ Phật đản ta chùa Quán Sứ, Hà Nội, nhih pah kan bah Trung ương Giáo hội Phật giáo Việt Nam.

Đại lễ Phật đản Phật lịch 2567 - Dương lịch 2023 tă bah Giáo hội Phật giáo Việt Nam ƀư rgum ta Chùa Quán Sứ - ntŭk hŏ ƀư âk nău kan khlay bah Phật giáo Việt Nam. Aơ lah nar kan chroh rƀŭn dŭt geh nkô̆ khlay tâm nău rêh nuih n’hâm n’hanh tĭng nău way bah ƀon lan tĭng chroh Phật, lah lễ hội văn hóa, chroh rƀŭn lam ntŭr neh dơi Đại hội đồng Liên hợp quốc kơp dơn.

Ntơh măt Kruanh rđău kan Đảng, Ngih dak, Mặt trận Tổ quốc Việt Nam n’hanh đah nău rŏng jru êng, Thủ tướng njuăl nău tât Chư tôn Giáo phẩm Giáo hội Phật giáo Việt Nam, tăng ni, ƀon lan phật tử tâm n’hanh bah dih dak nău mbah rhơn Đại lễ Phật đản Phật lịch 2567 bah Giáo hội Phật giáo Việt Nam nău dơi lĕ rngôch. Thủ tướng lah rjăp, đah bơi bar rbăn năm krêp dêh n’hanh ndrel hăn ăp rnoi nuĭh, Phật giáo Việt Nam hŏ lăp jru, rêng lam tâm lam rêh jêng kon nuĭh Việt Nam, lah du gâl khlay tâm  nău rêh văn hóa nuih n’hâm bah rnoi nuĭh Việt Nam; ŭch rŏng n’hanh nsing nơm Giáo hội Phật giáo Việt Nam mât uĕh tay nuih n’hâm nsum mpôl, sŏk nău rhŏ dŏng nsum an lam rêh jêng kon nuĭh, chroh uĕh,  rêh uĕh,  ntô̆ n’hao suan dăng tâm rnglăp lam rnoi nuĭh, yor du dak Việt Nam têh ndrŏng, geh dăng, rhơn răm./.