VOV4.M’nông – Măng 27/2, Thủ tướng Chính phủ Phạm Minh chính râng n’hanh ntoh ngơi bôk nău kan ƀư nkah gĭt Nar nai dak si Việt Nam 27/2 “Tahen ao nglang”. Thủ tướng Chính phủ Phạm Minh Chính ndơn măt kruanh Đảng, Ngih dak njuăl nău mbơh rhơn, lah uĕh hô tât nai dak si, nuĭh kan dak si ta lam dak, ăp nuĭh ƀư jêng nău uĕh khlay bah nău kan Y; ngăn lah rnôk lĕ rnoi mpôl rlet rlău jêr jŏt, tâm rnglăp nchăng n’gang srê Covid-19.

Thủ tướng ntoh ngơi

Thủ tướng lah rjăp, Kruanh Đảng, Ngih dak, ăp rmôt kan Đảng n’hanh n’gâng kan ƀon lan, ndrel lĕ rngôch nuĭh ƀon lan uănh lah prêh, wât n’hanh tâm pă đah âk jêr jŏt, ŏk r’ah, roh săk bah nău kan dak si, nai dak si nuĭh kan dak si. Thủ tướng đă ăp gưl, ăp nău kan, ăp ntŭk n’hanh kuăl jă nuĭh ƀon lan lam dak rgum âk an nău chuh, tâm nĕ ntrôl dăng nău chuh vaccin an kon se đăp mpăn, tam gay mât njrăng săk soan an ăp mon n’hanh ăp mon plơ̆ tay ngih sam ƀŭt đăp mpăn.

Nuĭh rblang: Y Sưng Phê Ja