VOV4.M’nông-Tâm kêng măng nar 6/3, Thủ tướng chính phủ Phạm Minh Chính ndrel đah ndơn kan leo kan du đê̆ n’gâng kan, ntŭk pah kan đah nuĭh leo kan n’gor Kiên Giang gay ma uănh năl nău geh hun hao wăng sa rêh jêng năm 2021, 2 khay bôk năm 2022 n’hanh mpŏng tât let năp tay. Ta rơh pah kan, Bí thư n’gor ủy Kiên Giang Đỗ Thanh Bình an gĭt, năm 2021, Kiên Giang tâm ban kơt âk n’gor geh nău tât khuch khat âk bâh nuh srê Covid-19, yơn lĕ 3 nkual wăng sa hôm nha geh hun hao bol ma mô âk tâm rnôk nău jêr jŏt. Nău wăng sa hun hao, GRDP hao 0,58%. Geh an tơm prăk ngih dak rlău 11 rbăn rmen prăk. Ntoh ngơi ta rơh nglôch lôch, Thủ tướng Phạm Minh Chính rnê n’hanh uănh năl âk nău geh ma n’gor Kiên Giang lĕ dơi geh tâm  ba năp nơh ngăn lah tâm nău kan njrăng rdâng nuh srê, ta meng nĕ, Thủ tướng lĕ nchŏng đă ăp nău kŏ khan, mô dơi n’hanh mpŏng tât hun hao. Thủ tướng đă, n’gor kiau meng an geh dŏng săk rnglăy ăp nău dơi, nău geh, nău nkhêp hun hao, pah kan răng dăng, njêng nău ntul rlong jêng nău nkhêp, jêr jŏt jêng nău nsrôih. Hun hao têh dăng nău wăng sa dak lêng, ntrôl dăng njêng tay tuch tăm , rgum hun hao ăp n’gâng kan công nghiệp geh nău dơi, nta nău nơih n’hanh ntŭk gŭ rêh dơh nơih an hun hao wăng sa rêh jêng.

Nuĭh rblang: Thị Đoắt