VOV4.M’nông – Măng nđaơ 31/5, ta Cung Thiếu nhi Hà Nội, Thủ tướng Chính phủ Phạm Minh Chính râng ƀư rgŏ jă Khay nău ƀư yor kon se n’hanh ntơm ƀư khay rlu nti năm 2022 đah bôk nău “Ndrel ty mât uănh, ntĭm nti n’hanh mât njrăng kon se” gay rgŏ jă tât râng dŭt n’hâm lơn tay bah ăp rmôt chính trị-rêh jêng, rmôt kan rêh jêng, rnăk wâl n’hanh nsum mpôl lăp nău mât uănh, ntĭm nti n’hanh mât njrăng kon se. Nar ƀư geh nklăp 1.200 ntoh măt, tâm nĕ geh bơi 700 kon se ntoh măt an rlău 25 rkeh kon se ta lam dak râng. Ntoh ngơi ta nar ƀư, Thủ tướng Chính phủ Phạm Minh Chính mbah rhơn 700 mon geh măt ta aơ n’hanh 25 rkeh kon se ta lam dak ndrel rnăk wâl, ăp nai ngăch dăng, uĕh lăng, ăp mon du rơh rlu nti geh nkô̆ nău, răm mơak, uĕh lăng. Di nar Quốc tế thiếu nhi 1/6, Ƀư rgŏ jă Khay ƀư yor kon se n’hanh Ntơm ƀư khay rlu nti năm 2022, Thủ tướng Chính phủ Phạm Minh Chính n’hanh kruanh ăp n’gâng kan, nău kan n’hanh kruanh UBND nkual ƀon têh Hà Nội lĕ khâl ăp kon se ji dôl săm ta Ntŭk Ung thư n’hanh ăp nău ji kon se dôl săm săk soan jêh Covid-19 ta Ngih dak si Nhi Trung ương.

Nuĭh rlang: Y Sưng Phê Ja