Ôi 8/12, ta nkuăl n’har bri n’gor Tây Ninh ndrel n’gor Prey Veng (dak Campuchia), Thủ tướng Chính phủ Phạm Minh Chính ndrel Thủ tướng Campuchia Hun Manet ndrel ƀư tơm nar ntơm ân dơi hăn ro mpông đah dak ba dih Tân Nam-Meun Chey. Ntoh nau tâm nar mâp, Thủ tướng Phạm Minh Chính lah rjăp mpông trong luh lăp đah bar dak Tân Nam-Meun Chey pơk luh “mpông trong hăn ro” mhe, rgop nau n’hao nau tâm rnglăp nthoi văng sa, tăch rgâl, pâl n’aih ndrel tâm n’ur ƀon lan đah bar dak, nkre ƀư nâp ntung nthoi tâm boh kan nsum jŏ jong.

Thủ tướng lah rjăp Việt Nam ndrel Campuchia lah bar dak “tâm dăch, geh nsum dak me Mekong, bun dăp nau tâm boh tâm dăch dơh ueh, tâm boh vay ơm, tâm boh ăp ntil, nâp nâl jŏ jong” lôch 60 năm rlau aơ. Ntrong mpông luh lăp đah dak ba dih njok bar n’har geh nau dơi khlay tâm nau hun hao nkuăl. Văng sa tăch rgâl bar ding ăp năm êp aơ mât nklăp 10 rmen đôla/năm ndrel nchrăp năm 2025 geh tât 12 rmen đôla./.