Ôi lơ 5/4, ta Viêng chăn, Lào, Rơh rƀŭn gưl prêh tal 4 Uỷ hội dak me Mekong lam ntur neh geh ƀư đah nkô̆ “Rgâl mhe ndrel tâm boh gay mât đăp mpăn tơm dak ndrel nau hun hao nâp nâl bah dak me Mekong”. Râng rƀŭn geh Thủ tướng ăp dak Việt Nam, Lào, Campuchia, Tổng thư ký Jrâu kan tơm dak ăp dak Thái Lan ndrel rđau kan ntoh măt bah ăp dak kan nsum tâm nchră, ăp dak hun hao, ăp ntŭk kan lam ntur neh, nkuăl, ăp ntŭk kan kơl an ndrel nsum mpôl.

Thủ tướng Chính phủ Phạm Minh Chính geh nau ntoh ngơi khlay tâm rơh rƀŭn. Thủ tướng Chính phủ dak nơm ntoh nau rvê mpeh nkuăl dak me dôl ma dâk bah năp nau ntul rlong ê mâp geh yor nau ntrơn rgâl bah mih, nar, nau mpeh đă bah hun hao văng sa ndrel nau hao dŏng dak ngăch, lah rjăp, ân geh rgâl nau mĭn tâm boh ndrel ăp nhoat hăn mhe geh dơi tŏng ăp nau đă ndal rnôk aơ, nkre leo luh du đê̆ nau kan tâm boh bah uỷ hội tâm rơh tât. Ndrel ma nê Thủ tướng đă ăp nau kan tâm boh kan nsum, ntrŭt dăng nau văng sa ndrih, văng sa nsum, hun ha ăp ndơ dŏng njêng tay, rgop nau hun hao nâp nâl./.