Tâm ba năp nơh, Đảng, ngih dak, Chính phủ lĕ geh âk rnoh kan têh gay ma hun hao nău geh ndơ dŏng ntung trong, pă ntuh kơl geh nău kan tơm khlăy ta ăp nkual, mpeh mper, ăp ntŭk.

Ntoh ngơi ta rơh lễ, Thủ tướng chính phủ Phạm Minh Chính nchŏng na nê̆, nău nchrăp kan ƀư trong têh Tuyên Quang- Hà Giang đah nău jong 105km, geh lĕ rnoh ntuh kơl 10 rbăn rmen prăk geh chính phủ pă an 2 n’gor Tuyên Quang n’hanh Hà Giang ƀư ntŭk kan mât leo, ƀư tĭng trong ntuh kơl nsum tâm bôk nău kan ndâk nsơm n’hanh hun hao wăng sa rêh jêng. Aơ lah nkô nău geh ƀư tĭng na nê̆ Nghị quyết bâh n’gâng kan chính trị mpeh hun hao wăng sa rêh jêng, mât đăp mpăn rnă njrăng, nkual rđŭng n’hanh gôl yôk mpeh Bắc bộ tât năm 2030, mpŏng uănh tât năm 2045. Thủ tướng dăn đă, lôch rơh ntơm pơk trong, đă ăp ntŭk kan, n’gâng kan rgum lĕ mpôl kan, tâm rlong nsrôih ƀư lôch ueh ăp nău kan geh ngluh mbơh.