Kêng măng nar 26/6, lôch hăn tât nkual ƀon têh Tian Jin (Thiên Tân), Trung Quốc, Thủ tướng Chính phủ Phạm Minh Chính hŏ leo mpôl ntơh măt gưl têh Chính phủ Việt Nam râng n’hanh geh nău lah ta rơh Tâm dâl nău têh jong neh dak Việt Nam n’hanh Rgum nchră wăng sa lam ntŭr neh (WEF) đah nkô̆: Ntrŭt ntrôl ăp suan hun hao mhe gay nta trong dơh an bar neh dak. Aơ lah nău kan tâm dâl nău gưl neh dak dơi WEF ƀư tâm trôm nar tâm nchră, gay nkoch nău tă ơm gĭt kan bah Việt Nam tâm ban kơt du trong ntĭt leo mpeh dâk hao tay wăng sa n’hanh dôl ntrŭt ntrôl ndơ̆ rgâl trong ntĭt leo hun hao, nta trong dơh mpeh ăp trong rƀŏng, trong kơl n’hanh ntŭk ntuh kơl- tăch rgâl ta Việt Nam. Lah ta rơh tâm nchră ngăn, Thủ tướng Phạm Minh Chính nkoch gĭt mpeh nô nău hun hao wăng sa- rêh jêng kon nuĭh Việt Nam, lah rjăp lah jâng wăng sa geh rnoh hun hao âk, bol tâm rnôk dŭt jêr jŏt, Việt Nam hŏ rdâng lơh geh nău tam n’hanh ăp ntul rlong bah dih, mât đăp mpăn wăng sa têh, kân bah hao khlay ndơ n’hanh đăp mpăn tâm rlak tâm ban têh, ntrŭt ntrôl hun hao, rdâk nâp njrăng n’gang neh dak, rnă njrăng, ntŭk gŭ rêh đăp mpăn an hun hao. Việt Nam dôl rgâl mhe dăng trong ntĭt leo hun hao, dăp rgum tay jâng wăng sa, ntrŭt ntrôl rgâl mhe  n’hanh ndơ̆ rgâl mbrô, ntrôl dăng ndơ̆ rgâl ŭnh nar, hun hao wăng sa kloh uĕh, wăng sa sĭt jêng tay. Thủ tướng Chính phủ dăn đă WEF n’hanh ăp dak lăp kan nsum tâm boh tay, ntop kơl Việt Nam mpeh công nghệ, prăk kaih, ntĭm nti  tơm nuĭh kan săk blău âk, mât bôk kan têh blău mhe.

          Kêng măng ndrel nar, Thủ tướng Phạm Minh Chính vơt wa Robert H.McCooey, Jr, Groi Kruanh rmôt kan Nasdaq (Hoa Kỳ). Thủ tướng lah ueh nau kơl an bah Nasdaq đah ntŭk kan tăch rgala bah Việt Nam, ŭch Nasdaq tâm nchră, nkoch mbơh đah Việt Nam mpeh ăp nau kan bah ăp dak têh, nau rƀŏng mpeh tơm prăk lam ntur neh ndrel nau pă mbơh ăp nau tă dơi blau gay kơl an hun hao ntŭk kan tơm prăk tâm dak, lŏ hăn nsum ma nau hun hao bah ăp ntŭk kan tăch rgâl bah Việt Nam. Groi Kruanh Nasdaq ntoh nau ueh mpeh nau tă dơi ndâk njêng ndrel hun hao văng sa bah Việt Nam, rnê prêh nau kan rđau tơm prăk-prăk kaih bah Chính phủ, rnơm tâm nau hun hao ueh bah ntŭk kan tăch rgâl bah Việt Nam, ton mra kơl an ăp ntŭk kan tăch rgâl bah Việt Nam rlet ngai tât lam ntur neh. Groi Kruanh Nasdaq ŭch geh vơt Thủ tướng Chính phủ khâl ntŭk kan ƀư chứng khoán Nasdaq tâm rơh ơm ngăn.

Tâm trôm nar tâm nchră WEF Thiên Tân đŏng, kêng măng nar 26/6, Thủ tướng Chính phủ Phạm Minh Chính hŏ wơt Giáo sư Klaus Schwab, Nuĭh ntơm njêng nkre ƀư Kruanh mât bôk kan WEF n’hanh uănh saơ lễ kí ton siƀŭt nchih nkah tâm boh (MOU) Việt Nam – WEF lvang năm 2023-2026. Thủ tướng lah rjăp Việt Nam mbra rôih sŏng tĭng trong đăp mpăn wăng sa têh n’hanh ntrŭt ntrôl hun hao. Thủ tướng dăn đă WEF hăn ndrel tay Việt Nam, ntop kơl buăt nthoi tay đah ăp doanh nghiệp lăp kan nsum WEF, kơl Việt Nam wăch rgum ntuh kơl têh, lơn lah tâm ăp trong kan công nghệ mhe, ndơ̆ rgâl ŭnh nar, ndơ̆ rgâl mbrô, ntŭk ntô ndơ dŏng jŏ jong n’hanh n’hao âk trong hăn tâm ôp rgâl. Thủ tướng dăn đă WEF nkoch mpeh trong rƀŏng hun hao bah lam ntŭr neh đŏng, mbơh nti trong kơl Việt Nam n’hao nău dơi tâm rlong, rgâl uĕh ntŭk ntuh kơl – tăch rgâl, bên di đah ăp quy định, trong rƀŏng mhe.