Kêng măng 27/6, ta Đại lễ đường Nhân dân, Thủ đô Bắc Kinh, Trung Quốc, Thủ tướng Chính phủ Phạm Minh Chính lĕ rgum nchră Tổng Bí thư Ban Chấp hành Trung ương Đảng Cộng sản Trung Quốc, Kruanh dak Cộng hòa nhân dân Trung Hoa Xi Jinping. Ta nar rgum nchră, Thủ tướng Phạm Minh Chính mĭn lah Việt Nam nsrôih nău kơl “du Trung Quốc”, uănh mĭn ăp nău ƀư mhe lam ntŭr neh bah Trung Quốc n’hanh nchrăp tâm nchră, tâm rgâl mpeh ăp nău ƀư mhe aơ.

Tổng Bí thư, Kruanh dak Trung Quốc Tập Cận Bình mĭn lah Trung Quốc uănh Việt Nam lah trong kơl an tâm lĕ rngôch nău kơl tâm rnglăp nchră nău bah Trung Quốc; aơ lah nău săch trong kan bah Trung Quốc ta nău hun hao jŏ jong bah tâm boh Trung-Việt; mpŏng n’hanh nchrăp ntrôl tâm boh 2 Đảng, 2 dak nar lơ hun hao, hăn jru, ngăn ngên. 2 ding tâm rgâl mpeh ăp nău lam ntŭr neh, nkual ndrel uănh, tâm ban ŭch uănh nđôi ndrel n’hanh mkra tâm di nău tâm rkeh, mât tâm rnglăp, đăp mpăn ta dak lêng, nâp nâl ntŭk ntô dơh an nău hun hao bah ăp dak.