Ôi nar 9/12, Thủ tướng Chính phủ Phạm Minh Chính ndrel mpôl ntơh măt gưl têh Chính phủ Việt Nam hŏ tât Thủ đô Luxembourg, ntơm hăn khâl ngăn Đại Công quốc Luxembourg. 

Lôch rơh Lễ wơt rgum, bar Thủ tướng hŏ ƀư tâm nchră. Ta rơh tâm nchră, Thủ tướng Chính phủ Phạm Minh Chính mpơl nău rhơn lor bôk năp tât khâl Đại Công quốc Luxembourg, lah uĕh nău wơt ăp tŏng bah Chính phủ Luxembourg an mpôl hăn khâl. Thủ tướng lah rjăp Việt Nam way ŭanh khlay tâm boh lam lĕ rngôch đah Luxembourg, du dak râng ntơm njêng, geh nău khlay kan bah Liên minh châu Âu (EU). Mbah rhơn Thủ tướng Chính phủ Phạm Minh Chính khâl ngăn Luxembourg, hăn khâl gưl têh lor bôk năp 10 năm đah bar dak, Thủ tướng Xavier Bettel rnê âk nău khlay bah trong hăn khâl, mpơl nău nsing nơm hăn khâl mbra n'hao tâm boh bar dak tât rơh hun hao mhe.

Bar Thủ tướng lah rjăp nău khlay bah nău an ƀư geh nău tam tâm trôm tâm boh hŏ geh, nkre gŭ mĭn njêng trong way kan tâm boh mhe tâm di đah săk geh, nău ŭch geh hun hao bah bar dak. Bar ding tâm ban ŭch ntrŭt ntrôl ơm njêng tâm boh têh jong mpeh prăk kaih kloh rvoah, gay ndăn dŏng săk geh bah Luxembourg mpeh tơm prăk ntuh kơl, lơn lah prăk kaih kloh rvah, gay ntop kơl Việt Nam an ƀư trong kan têh jong gưl neh dak mpeh n'hao hun hao kloh uĕh n'hanh ntop kơl rdâng lơh đah rgâl duh nđik trôk nar, tâm nê geh nău tĭng ƀư ăp nău ton hŏ n'gluh ta COP 26.

VOV/Nuĭh rblang: Điểu Thân