Nar 07/4, ta Nhih pah kan Chính phủ, Thủ tướng Chính phủ Phạm Minh Chính hŏ wơt Đại sứ Đặc mệnh toàn quyền Malaysia, Campuchia ta Việt Nam nkhêp geh ăp đại sứ ntơm dơn nău kan ta Việt Nam.

 Ta rơh wơt Đại sứ Đặc mệnh toàn quyền Malaysia, Thủ tướng Chính phủ Phạm Minh Chính rhơn wa Dato’ Tan Yang Thai dơn nău kan ta Việt Nam n'hanh mpŏng tâm năm kan bah he, Đại sứ mbra nsrôih mât uĕh nău khlay kan lah ntung njŏ tâm boh khlay gay ntrŭt ntrôl tâm boh dja hun hao tay jru hvi n'hanh geh nău tam.

Ta rơh wơt Đại sứ Campuchia ta Việt Nam, Thủ tướng Chính phủ Phạm Minh Chính hŏ mbah rhơn wa bu ur Chea Kimtha dơi ntăm bu ur Đại sứ lor bôk năp bah Campuchia ta Việt Nam; mbah rhơn ăp nău dơi têh kuâng mpeh tâm trôm n'hanh bah dih ma Campuchia hŏ geh tâm boh tâm bah ri aơ nơh. Thủ tướng nsing nơm Campuchia mbra ƀư geh nău dơi rơh bầu cử Quốc hội khóa VII n'hanh Đại hội Thể thao Đông Nam Á tâl 32, lah rjăp Việt Nam mbra kơl, tâm pă nău tă ơm gĭt kan gay Campuchia ƀư geh nău dơi nar thể thao khlay ta nkual dja. Thủ tướng dăn đă bar ding nsrôih tâm nchră tay nkra 16% trong n'har bri mô hŏ ƀư lôch jêh tâm pă ntăm n'gâng gay rdâk njêng trong n'har bri tâm rnglăp, tâm boh n'hanh hun hao; nkre dăn đă mpeh Campuchia uănh khlay tay, nkra siƀŭt tâm di an nuĭh tơm Việt ta Campuchia, nta trong dơh an mpôl nuĭh Việt Nam ta Campuchia wăng sa, gŭ rêh đăp mpăn ta Campuchia.