VOV4.M'nông: Ôi 17/10/2022, Thủ tướng Chính phủ Phạm Minh Chính hŏ wơt Bộ trưởng mât uănh tăch rgâl n'hanh ƀư njêng Australia Tim Ayres nkhêp geh hăn khâl Việt Nam ndrel ƀư tơm rgum nchră gưl têh OECD – Đông Nam Á 2022 ta Hà Nội.

Thủ tướng đă Bộ trưởng Tim Ayres uănh khlay ntrŭt ntrôl lơn đŏng tâm boh wăng sa- tăch rgâl ntuh kơl đah bar dak, tâm nê geh nău Australia pơk tay trong tăch rgâl an ăp ndơ tuch tăm, tui ka Việt Nam; nta trong dơh an ăp doanh nghiệp Việt Nam ntuh kơl ta Australia nkre ntrŭt nsôr ăp doanh nghiệp Australia n'hao âk ntuh kơl tâm Việt Nam. Thủ tướng dăn đă Australia nta trong dơh an nuĭh Việt Nam ta Australia gŭ rêh, pah kan, lăp rgum dơh soih ta dak tơm jay. Bộ trưởng Tim Ayres lah rjăp Chính phủ Australia way uănh khlay tâm boh têh jong đah Việt Nam n'hanh ŭch rŏng êt lhăt tâm boh bar ding đah Việt Nam; ntrŭt ntrôl lơn đŏng tâm boh đah Việt Nam ta ăp trong kan wăng sa- tăch rgâl- ntuh kơl- tuch tăm mât rong- ntĭm nti, văn hoá, nuĭh kan./.

VOV/Nuĭh rblang: Điểu Thân