Ta Nhih pah kan Chính phủ, Thủ tướng Chính phủ Phạm Minh Chính hŏ wơt Bộ trưởng Ngoại giao Australia Penny Wong. Thủ tướng Chính phủ Phạm Minh Chính rhơn rnê wa Penny Wong tâl bar hăn khâl Việt Nam kalơ nău kan Bộ trưởng Ngoại giao Australia; mpơl nău nsing nơm, hăn khâl tay dŭt geh nău dơi mhe aơ bah Kruanh rđău kan Australia,  hăn khâl rơh dja bah Bộ trưởng mbra rgop khlay tâm nău mât jâng nsan, ntrŭt ntrôl tâm boh têh jong Việt Nam - Australia dôl hun hao dăng tâm năm bar dak nkah ndray 50 năm nar njêng tâm boh (1973-2023).

Thủ tướng Chính phủ Phạm Minh Chính lah rjăp, bar dak ân n’hao dăng tâm boh mpeh ntĭm nti, nuĭh kan, tâm nđŭr văn hóa, ƀon lan, ntrŭt nsôr doanh nghiệp bar dak pơk hvi ntuh kơl tâm ăp ntil trong kan bar ding săk geh âk; nkre ntrôl dăng tâm boh tâm ăp trong kan mhe kơt rdâng lơh rgâl trôk nar, rgâl ŭnh nar, hun hao nđĭr uĕh, wăng sa mbrô, rgâl mbrô....