VOV4.M'nông: Dơn nău jă bah Kruanh rđău kan gưl têh n'hanh Chính phủ Liên bang Nga, Thủ tướng Chính phủ Phạm Minh Chính hŏ râng Rgum nchră wăng sa Phương Đông ƀư ta nkual ƀon têh Vladivostok, Liên bang Nga tĭng trong ƀư rhôp rup. Tâm nău lah, Thủ tướng Chính phủ lah rjăp rgum nchră geh nkô̆ khlay ngăn ngăn gay n'hao tâm boh dak bah dih, rgop mât đăp mpăn, tâm boh n'hanh hun hao ta nkual Châu Á – Thái Bình Dương n'hanh lam ntŭr neh. Thủ tướng Chính phủ lah rjăp Việt Nam trong nchrăp rdâk njêng jâng wăng sa mât êng n'hanh nsrôih lăp rgum dak bah dih jru hvi, ngăn ngăn.

Mpeh tâm boh wăng sa bar ding Việt Nam - Nga, Thủ tướng Chính phủ lah rjăp: way ŭanh khlay tâm boh têh jong lam lĕ rngôch đah Liên bang Nga, rnê âk nău jêh geh tâm boh wăng sa đah bar dak tâm ăp năm rlău aơ, lơn lah tâm ăp trong kan kơt ŭnh nar, công nghiệp n'hanh du đêt trong kan êng. Mpôl hên ŭch rŏng ntrôl dăng tay tâm boh đah ăp n'gâng kan, trong kan ma bar ding săk geh, ndăn dŏng lĕ ăp trong dơh soih bah nău an ƀư tâm ton bar ding dah rŏng tăch rgâl đah Việt Nam n'hanh Liên minh kinh tế Á Âu. Thủ tướng Chính phủ lah rjăp Việt Nam rhơn rnê nău krêp dêh wăng sa đah Nga, lơn lah nkual Viễn Đông, đah ăp dak Châu Á - Thái Bình Dương, ntrŭt ntrôl tâm boh têh jong lam lĕ rngôch ASEAN - Nga.

Nuĭh rblang: Điểu Thân