Nar ntri (12/4), ta rơh hop tâl 5 Ban rđău đă Ngih dak ƀư ăp trong nchrăp kan tơm khlay gưl neh dak, Thủ tướng Chính phủ Phạm Minh Chính hŏ jao ăp nău kan đah tĭng rmôt trong nchrăp kan na nê̆, an tĭng n’gâng kan, tĭng n’gor, đơn vị. Lơn lah đah rmôt trong nchrăp kan dôl ƀư, tâm nê geh 3 trong cao tốc nchrăp ƀư lôch jêh n’glăp dŏng tâm 30/4 năm aơ (lah : Mai Sơn – Quốc lộ 45; Dầu Giây - Phan Thiết; Phan Thiết - Vĩnh Hảo), Thủ tướng đă,  Bộ Giao thông vận tải ân rđău đă ngăn ăp nuĭh tơm ndranh ƀư ndăn n’hao âk ndeh rklư, nuĭh kan gay năn dŏng di rnoh ngăch, đăp mpăn nâp uĕh- đăp mpăn hăn ntung trong.

Đah 14 n’gor, nkual ƀon têh lah nhih pah kan tơm mât 3 trong cao tốc Đông-Tây n’hanh 2 trong nduar. Thủ tướng đă ntrôl ngăch an ƀư gay ntơm ƀư ăp trong nchrăp kan bah năp nar 30/6/2023. Thủ tướng đă Bộ Giao thông vận tải kan nsum đah ăp n’gâng kan, ăp n’gor ndăn nkra ăp siƀŭt mpeh trong nchrăp kan; rgum ăp nău kŏ kol geh tât rgâl neh tăm ba, neh tăm bri, trong kơl n’hanh rong an dơh gay Ủy ban Thường vụ Quốc hội, Quốc hội mĭn uănh.