Aơ lah tal 4 Thủ tướng geh tât râng kan, ntrŭt đă nău ƀư tach ndeh păr đah dak bah dih Long Thành tâm rlău 2 năm ba năp, an saơ nău mât kơl dŭt khlăy bâh Đảng, Ngih dak đah nău kan aơ.

Ta rơh pah kan ta ntŭk kan, Thủ tướng Phạm Minh Chính lah na nê̆, aơ lah nău kan ntĭt an năm kan bâh Đại hội 13 bâh Đảng, yor nĕ, Thủ tướng đă rhoăt gleh ngăch nar kan đah ntơm nơh, đah nkô̆ ŭch tât nar 31/12/2025 an ƀư lôch nău kan aơ gay ma vơt rhơn Đại hội Đảng lam dak tal 14, kahgĭt 80 năm Quốc khánh, 50 năm rklaih đăp mpăn miền Nam, dơn ngoăy neh dak. Thủ tướng đă n’gâng kan mât uănh ntung trong ngăch ndăn mbơh tơih an gâl kan geh nău dơi trong nchrăp ntuh kơl ƀư trong ndeh păr mpăr tal 2, Groi Thủ tướng Lê Thành Long lĕ tât ntĭm đă nău mbơh tơih đă ntop tay nkô̆ nău aơ ta bôk nău kan rơh rƀŭn nchră tal 8 Quốc hội khóa 15.