VOV4.M’nông – Nar 3/6, Thủ tướng Chính phủ geh Công điện mpeh nău tĭng nău ntrŭnh mpeh njrăng n’gang khuch bah ndrănh, bia. Công điện bah Thủ tướng Chính phủ nkoch kloh, bah bôk năm tât aƀaơ, geh du đêt nău rmanh ndeh khuch hô ma nkô̆ nău lah yor nuĭh tih ngêt ndrănh ƀĭt ndeh hăn trong; tâm nĕ, geh du đêt cán bộ, công chức, viên chức, nuĭh pah kan tâm ngih pah kan ngih dak tih ngêt ndrănh ƀĭt ndeh ƀư rmanh, ntoh lư lah nău rmanh ndeh geh măng nar 2/6/2022 ta n’gor Bắc Giang ƀư 3 nuĭh khĭt. Gay nking n’gang ăp nău rmanh geh tât nuĭh ƀĭt ndeh tih ngêt ndrănh rnôk hăn trong, Thủ tướng Chính phủ đă ăp n’gâng kan, ngih pah kan tâm ban bộ, ngih pah kan mpeh tâm Chính phủ, Ủy ban Trung ương Mặt trận Tổ quốc Việt Nam, ăp nsum mpôl chính trị-rêh jêng, Ủy ban nhân dân ăp n’gor, nkual ƀon têh mpeh tâm Trung ương n’hanh ăp ntŭk kan geh tât ntĭm rđău ƀư tĭng rjăp Luật njrăng, n’gang khuch bah ndrănh, bia. Đă cán bộ, công chức, viên chức, nuĭh pah kan tâm ngih pah kan, kon hŏk, sinh viên ƀư tĭng rjăp ăp nău ntrŭnh mpeh mô an ngêt ndrănh, bia; ntrong leo lor ƀư tĭng rjăp nău ntrŭnh lĕ ngêt ndrănh, bia mô ƀĭt ndeh; geh trong rmal rjăp đah êng nuĭh, nsum mpôl tih.

Nuĭh rblang: Y Sưng Phê Ja