VOV4.M'nông: Kêng măng 14/3, Thủ tướng Chính phủ Phạm Minh Chính, Kruanh Ƀan rđău đă neh dak mpeh njrăng, n'gang nuh srê COVID-19 hŏ râng rơh mâp măt, lah uĕh băl tâm boh dak bah dih hŏ ntop kơl Việt Nam tâm njrăng, n'gang nuh srê COVID-19 tă bah Bộ Ngoại giao kan nsum đah nhih pah kan Liên hợp quốc ta Việt Nam ƀư. Ta rơh mâp măt, Thủ tướng Phạm Minh Chính an gĭt, năm 2022, Việt Nam nsrôih lah năm lơh dơi nuh srê, tĭng kơn "plơ̆ tay kơt ơm mhe" đah nuh srê COVID-19, ntrŭt ntrôl dâk hao ngăch, hun hao wăng sa- rêh jêng kon nuĭh nâp dăng, mât chăm đăp mpăn lam rêh jêng kon nuĭh. Ta năp nô nău nuh srê nchroh mbra hôm tât krit nji tay, jêr năl lor, jêr chroh lor, đah trong rƀŏng nking nchăng nău ntưp rêng, mô an geh lhăt bêng ir ta nhih dak si, Việt Nam dôl ndăn ngăch tâm nău ƀư chuh lam vaccine n'glai 3 an nuĭh rlău 18 năm deh n'hanh ƀư lôch jêh chuh n'glai 2 an nuĭh ntưm bah 12-17 năm deh; nchrăp chuh an kon se ntơm bah 5-11 năm deh, mĭn uănh chuh n'glai 4 n'hanh chuh an kon se ta nâm 5 năm deh; n'hao nău dơi kan dak si, lơn lah nău dơi kan dak si rnă njrăng lor n'hanh dak si tâm dâng, an ƀư geh nău tam bôk nău kan lam lĕ rngôch njrăng, n'gang nuh srê COVID-19 du trong khoa học./.

Nuĭh rblang: Điểu Thân