Kêng măng 17/5, Thủ tướng Phạm Minh Chính hŏ vơt Giám đốc rmôt kan John Cockerill, Bỉ, wa Francois Michel ndrel nŭih kan ntoh măt bah dak Bỉ gŭ kan ta Việt Nam, wa Karl Van Den Bossche. Tâm nar mâp, Thủ tướng Phạm Minh Chính mbơh Việt Nam du nuih n’hâm ntrong kan tâm nchră êng, dah rŏng, đăp mpăn, tâm boh ndrel hun hao, âk ntil nau kan, nau ƀư, ndâk njêng nau kan văng sa êng, ƀư nâp geh nsum ma nau nchrăp, tâm rnglăp đah lam ntur neh jru, ngăn, nâp tam.

Nŭih kan ntoh măt bah Bỉ ta Việt Nam wa Karl Van Den Bossche lah rjăp, Bỉ ŭch n’hao nau tâm boh đah Việt Nam tâm ăp nau kan, ngăn lah tâm rnôk bar dak dôl nkah 50 năm nau tâm boh ndâk tâm nchră, rnê prêh nau kan Chính phủ Việt Nam hŏ ƀư nau rgum điện VIII, aơ lah nau dơi khlay gay ăp rmôt kan ƀư ăp nau kan điện. Thủ tưóng ŭch, ntoh măt Karl Van Den Bossche lŏ ntrŭt dăng, kuăl jă ntŭk kan tăch rgâl bah Bỉ ntuh kơl tâm Việt Nam, ngăn lah tâm nau kan mhe ntoh kơt ntrơn rgâl mrô, rgâl nau blau mhe, ntrơn rgâl ndrih./.