Ôi 5/11, Thủ tướng Chính phủ Phạm Minh Chính ƀư tơm rƀŭn nchră lam dak uănh lah săk rnglăy ƀư tĭng ntĭm đă mrô 1 mpeh n’hao trong kan puh nsĕt ŭnh sa tâm nu nău mhe. Bah bôk năm 2023 tât aƀaơ lam dak geh bơi 3 rbăn rơh ŭnh sa n’hanh nău geh ŭnh sa, ƀư 134 nuĭh khĭt, ƀư sôt dô 101 nuĭh, mpeh drăp ndơ kơp bôk năp bơi 230 rmen prăk. N’glôn jêh rƀŭn nchră, Thủ tướng Phạm Minh Chính uănh lah prêh nău nsrôih, săk rnglăy ăp n’gâng kan nău kan, ƀon lan, ăp rmôt kan lĕ dơi geh tâm trong kan puh nsĕt ŭnh sa n’hanh kơl nuĭh rmanh năm bah năp, lĕ rgop nta an ntŭk ntô rnă njrăng, đăp mpăn, nău rêh.

Ndrel đah nĕ, Thủ tướng đă ƀư rjăp uănh dơn trong kan puh nset ŭnh sa n’hanh kơl nuĭh rmanh, hôm e âk nău nkân, an ndăn, dŭt n’hâm mkra. Thủ tướng ntĭm kloh, nău rđău ƀĭt joet, ƀư tĭng trong kan njrăng n’gang puh nsĕt ŭnh sa n’hanh kơl nuĭh rmanh geh ntŭk mô hŏ săk rnglăy. Thủ tướng đă ăp n’gâng kan, kruanh ngih pah kan tâm ban Bộ, Kruanh UBND ăp n’gor, nkual ƀon têh rhoăt rjăp nău blău ơm nkra rgâl tâm trong ntĭm rđău ƀĭt joet trong kan njrăng n’gang puh nset ŭnh sa n’hanh wơt kơl nău rmanh.