Ôi 2/11, ta Hà Nội, Thủ tướng Phạm Minh Chính ƀĭt joet Ƀư wơt n’hanh rgum nchră đah Thủ tướng Hà Lan Mark Rutte hăn khâl na nê̆ Việt Nam. Ta rgum nchră, 2 Thủ tướng lĕ tâm rgâl lĕ rngôch mpeh nu nău hun hao wăng sa-rêh jêng ăp dak, ăp trong mkra ntrôl tâm boh ăp ding n’hanh ăp nău lam ntŭr neh, nkual ndrel uănh. Thủ tướng Hà Lan nkoch nău uĕh ta năp ăp nău geh bah Việt Nam tâm rnôk rdâk hao n’hanh hun hao wăng sa rêh jêng jêh srê Covid-19 n’hanh kơp bah rơh khâl năm 2019 bah wa. 2 kruanh rđău kan uănh lah prêh nău nsrôih bah ăp ding tâm nău ƀư tĭng ăp tâm ton n’hanh tâm ban ŭch kan ndrel lĕ dơi ký.

2 hê Thủ tướng tâm ban ŭch n’hao nsing nơm chính trị tă bah tâm rgâl mpôl gưl prêh, mbơh ƀư săk rnglăy ăp trong kơl n’hanh tâm ton kan ndrel ăp ding, nkre mĭn njêng ndâk ƀư ăp trong kơl mhe gay ƀư jru kan ndrel nău way kan đah 2 dak; mĭn lah wăng sa-tăch rgâl lah n’gâng tơm khlay tâm boh 2 dak, ngăn lah mbơh ƀư tŏng ăp, săk rnglăy Hiệp định Tăch rgâl dah rŏng yor Việt Nam-EU (EVFTA). 2 kruanh rđău kan tâm ban ŭch ntrôl dăng tâm rnôk kan ndrel têh hvi mpeh tâm di đah rgâl trôk nar, mât uănh dak, lŏ mir nâp nâl, rgop ndrel ty rdâng đah ăp ntŭl rlong lam ntŭr neh. Jêh Rgum nchră, 2 Thủ tướng lĕ uănh ƀư jao an 04 sam ƀŭt khlay kan ndrel đah ăp n’gâng kan, nău kan, hiệp hội 2 dak tâm ăp ntil nău kan sroh joi n’hanh dŏng nâp nâl ăp khoáng sản khlay, hải quan, ntuh kơl, tăch rgâl.