Ôi lơ 29/6, ta ntŭk kan Chính phủ, đah nau ƀư tơm bah Thủ tướng Chính phủ Phạm Minh Chính, Chính phủ rƀŭn nkô̆ nau mpeh nau ndâk njêng luật khay 6/2023. Tĭng bôk nau kan tâm rơh rƀŭn aơ, Chính phủ uănh, rgop nau mpeh nau kan tâm 4 nkô̆ nau đă ndâk njêng pháp luật: Đă nau ndâk kan Luật nai nti kon se, Bôk nau kan Luật Lưu trữ (rgâl nkra); Đă ndâk njêng nau nchrăp Luật rgâl nkra, ntop tay ăp nau ntrŭnh bah nau nchrăp luật geh nau ntrŭnh geh tât nau ntuh kơl, tơm prăk gay ma doh rklaih nau jêr, nkol bah ăp bôk nau kan ntuh kơl nsum.

Ntoh nau tâm nar rƀŭn, Thủ tướng Chính phủ mbơh, ƀư 1 tâm 3 nau kan rgâl mhe ntrong kan, ntơm năm 2022 tât rnôk aơ, Chính phủ mât ân tâm ban ăp khay geh du rơh rƀŭn nchră ndâk njêng pháp luật. Rơh rƀŭn khay 6, Quốc hội gưl 15 tâm khay 10 aơ tă Chính phủ mra mbơh tât Quốc hội nchră luh 9 nau nchrăp Luật, rgop nau mpeh 8 nau nchrăp Luật, tâm nê geh âk đạo luật jêr nkol, geh âk nau rgop êng êng. Ndri ma, Thủ tướng đă ân geh nau rgum tu tơm gay nchrăp ueh, đăp mpăn nau dơi, nau nâp ndâk njêng pháp luật, ăp luật, doh rklaih geh ăp nau nkol, njêng trong kan pháp lý mhe ân ueh nau dơi ân ntrong hun hao./.