Ta rơh rƀŭn, ăp nuĭh chính phủ tâm nchră uănh mĭn tay an rgop, ntrŭnh đah 11 nkô̆ nău geh 6 nău nchrăp ƀư luật geh: Phòng không nhân dân; mât uănh, dŏng ndrăk nsiu, ndơ rtoh n’hanh ndơ ntop kơl (nkra rgâl); Drăp ndơ văn hóa (nkra rgâl); nkra rgâl, ntop tay du đêt điều bah Luật Tiểu chuẩn n’hanh Quy chuẩn kỹ thuật; nkra rgâl, ntop tay du đêt điều bah Luật Dược. Nkre uănh mĭn tay dăn đă ndâk njêng ăp luật: Grat, gưl tâm rnglăp nchră nău; Hàng không (nkra rgâl); Trong ndeh treng (nkra rgâl); Địa chất n’hanh Khoáng sản; Công nghiệp công nghệ mrô; n’hanh dăn đă mpeh Bôk nău kan ndâk njêng luật, pháp lệnh năm 2025, nkra rgâl di Bôk nău kan ndâk njêng luật, pháp lệnh năm 2024.

Tĭng thủ tướng, 11 nkô̆ nău dơi uănh mĭn an rgop, ntrŭnh, jêr jŏt, geh khuch dŭt têh tât nău ndâk njêng trong pháp luật tâm ban, lôch jêh, rgâl mhe, ƀư soih ăp nuĭh kan an hun hao. Thủ tướng Chính phủ đă ăp Kruanh n’gâng kan, Kruanh ngih pah kan mpeh tâm Chính phủ n’hao prêh nuih n’hâm, nău kan, ntĭm rđău na nê̆, ƀĭt joet, ndơ̆ an nău mĭn, trong mkra tâm nchră, trong gĭt tât nău an ndâk njêng pháp luật, đăp mpăn ngăch, n’hao uĕh, rgum prăk, nuĭh kan an trong kan ndâk njêng pháp luật.