Ôi nđaơ 15/2 (nar 6 Tết), nar pah kan bôk năp jêh rơh rlu tết Nguyên đán 2024, Thủ tướng Chính phủ Phạm Minh Chính ƀư tơm rơh rƀŭn Rnâng kan Chính phủ gay uănh lah nu nău Tết Nguyên đán Giáp Thìn 2024 n’hanh mbơh ƀư ăp nău kan khlay jêh Tết. Jêh rnôk djăt ăp nău rgop ntoh ngơi, n’glôn jêh rƀŭn, Thủ tướng Phạm Minh Chính djôt dơn, rnê rhơn ăp n’gâng kan, nău kan, ƀon lan, ngih pah kan, rmôt kan dơi kan lĕ ƀư uĕh nău kan tâm rơh tết.

Lơn lah Thủ tướng djôt dơn, lah uĕh, uănh lah prêh ăp rmôt kâp uănh ta ăp nău kan, mât đăp mpăn, ƀư tơm, uĕh lăng neh ntu, n’har bri, Neh dak; đăp mpăn chính trị, đăp mpăn nău rêh jêng; đăp mpăn săk soan, nău rêh bah nuĭh ƀon lan tâm rơh răm năm mhe wơt Tết; ăp rmôt ƀư răk ntŭk ntô gŭ âm đăp mpăn an neh dak he kloh uĕh, đăp mpăn; rhŏ an tam, săk rnglăy Nău ntĭm đă bah Ban Bí thư, Chính phủ ƀư an ƀon lan wơt Tết.