VOV4.M'nông: Ôi 5/4, ta Nhih pah kan Chính phủ, Thủ tướng Phạm Minh Chính ƀư tơm rơh Tâm nchră pơk sŏng dăng lam dak mpeh nô nău wăng sa- rêh jêng kon nuĭh khay 3 n'hanh 3 khay năm 2022, an ƀư bôk nău kan dâk hao tay n'hanh hun hao wăng sa- rêh jêng kon nuĭh, nô nău n'hanh nkra trong ntrŭt ntrôl rnoh ngăch tâm pă, n'gluh tơm prăk ntuh kơl ngih dak năm 2022, nău an ƀư ăp ntŭk kan têh khlay gưl neh dak.

Lah ta rơh tâm nchră, Thủ tướng Phạm Minh Chính lah rjăp, nar 5/1, Chính phủ ƀư Tâm nchră pơk sŏng dăng đah ăp n'gor mpeh nô nău hun hao wăng sa- rêh jêng kon nuĭh năm 2022, tât aƀaơ, di 3 khay lôch tâm nchră dja, ân uănh năl nău an ƀư pah kan năm 2022, nău lăp kan lor, nău nsrôih bah ƀon lan, nsum mpôl doanh nghiệp ta nâm nău ƀĭt juel bah n'gâng kan ăp gưl. Thủ tướng đă, ăp nhih pah kan ta Trung ương ân geh trong nkra năn ngăch, bah ir tât khuch djơh, đah nău ŭch n'glĕ dŭt lah đăp mpăn wăng sa têh ăp nău tâm rlak tâm ban têh, rdâk njêng jâng wăng sa nsrôih ndôr êng.

Thủ tướng đă ăp nuĭh rgum lĕ nău gĭt blău, uănh tay ăp nău tă ơm gĭt kan hŏ ƀư mhe aơ, rhuăt luh nău tă ơm gĭt kan, ndơ̆ luh trong nkra ntơm bah aơ tât kêng dŭt năm tĭng ƀư ăp Nghị quyết bah Quốc hội, Chính phủ, ƀư jêng ngăn ngăn nău n'glôch jêh bah Tâm nchră Trung ương 4 khay 10/2021./.

Nuĭh rblang: Điểu Thân